काठमाडौं । फुटबल विवादको छानबिन गर्न गठित समितिले समय थप्ने तयारी गरेको छ ।
तोकिएको ७ दिनभित्र छानबिन नसकिएको भन्दै समितिले राष्ट्रिय खेलकुद परिषद् (राखेप) सँग थप केही दिन समय माग गर्ने तयारी गरेको हो ।
‘बयानको काम सकिएको छ । महत्वपूर्ण बुँदा टिपोट भएका छन् । बयानका आधारमा प्राप्त बुँदालाई लिपिबद्ध गर्न बाँकी छ । केही दिन लाग्ने देखिन्छ । राखेपसंग समय थप गर्न आग्रह गर्ने तयारी छ ।’ समितिका एक सदस्यले खेलपाटीसँग भने ।
राखेपले फुटबल विवादको छानबिन गर्न पुरेन्द्रबिक्रम लाखे संयोजकत्वको ७ सदस्यीय छानविन समिति गठन गरेको थियो । समितिलाई ७ दिनभित्र अनुसन्धान प्रतिवेदन पेश गर्न अख्तियारी प्रदान गरिएको थियो ।
राखेपले दिएको समय गत शुक्रबार सकिएको छ । हिजो शनिबार बिदाको दिन भएकाले थप काम अघि बढ्न सकेन । समितिले केही दिन थप गरेर प्रतिवेदन तयार गर्ने जनाएको छ । सोही अनुसार राखेपसंग दुईदेखि तीन दिनको समयका लागि आग्रह गर्ने तयारी भएको छ ।
‘बयानलाई लिपिबद्ध गरेपछि छानबिनलाई निष्कर्शमा पुर्याउनेछौं । केही दिनभित्र प्रतिवेदन तयार हुन्छ ।’ तीन सदस्यले थपे ।
समितिले छानविनको सुरुवातमा घटनामा प्रत्यक्ष र अप्रत्यक्ष रुपमा मुछिएका व्यक्तिलाई बयानका लागि बोलाएको थियो ।
समितिले घटनामा संलग्न एन्फाका वरिष्ठ उपाध्यक्ष पंकज विक्रम नेम्वाङ, मुख्य प्रशिक्षक अब्दुल्लाह अलमुताइरी सहित १४ जनाको बयान लिएको छ ।
एन्फा अध्यक्ष कर्माछिरिङ शेर्पाबाट बयान सुरु गरेको समितिले शुक्रबार अन्तिममा घटनाका केन्द्रिय पात्र वरिष्ठ उपाध्यक्ष र मुख्य प्रशिक्षकसँग सोधपुछ गरेको छ ।
वरिष्ठ उपाध्यक्षलाई कारण देखाउँदै मुख्य प्रशिक्षकले पदबाट राजीनामा दिने घोषणा गरेपछि एन्फा विवाद उत्कर्षमा पुगेको देखिएको थियो । दुवै पक्षले घटनाको छानबिन गर्न भन्दै एन्फामा निवेदन दिएका थिए । जसमा दुई खेल पत्रकारले समेत प्रशिक्षकद्धारा दुर्व्यवहार भएको आरोप सहित एन्फामा निवेदन दिएका थिए ।
प्राप्त निवेदनमाथि छलफल गर्दै एन्फाको कार्यसमिति बैठकले घटनाको छानबिनका लागि युवा तथा खेलकुद मन्त्रालयलाई आग्रह गर्ने निर्णय गरेको थियो । एन्फाको आग्रह अनुसार मन्त्रालयले घटनाको छानबिनका लागि राखेपलाई पत्राचार गरेको थियो । मन्त्रालयले घटनाको छानबिन गरि सुझाव सहितको प्रतिवेदन पेश गर्न राखेपलाई निर्देशन दिएको छ ।
-1732590134.webp)
