काठमाडौं । सत्तारुढ दल नेकपा एमाले निकट नेपाल खेलकुद महासंघ आईतबार राजनीतिक नारा सहित सडक प्रर्दशनमा उत्रिएको छ । बिपक्षी गठबन्धको असंवैधानिक तथा राष्ट्रघाती कदमको विरुद्ध भन्दै खेलकुद महासंघले सडक प्रर्दशन गरेको हो ।
नेपाल खेलकुद महासंघ प्रधानमन्त्री समेत रहेका एमाले अध्यक्ष केपी ओली निकट खेलकुदमा काम गर्ने पार्टीको जनवर्गिय संगठन हो । पार्टीभित्र अन्तरविरोध बढ्दै गएपछि माधव नेपाल निकट पुरुषोत्तम पौडेललाई हटाएर ओलीले महासंघमा समानान्तर कमिटी गठन गरेका थिए । युवा संघबाट बाहिरिएका रमेश पौडेललाई खेलकुद राजनीतिमा स्थापित गर्ने उद्धेश्य सहित महासंघ गठन गरिएको थियो । खेलकुद भन्दा तत्कालिन युवा संघको राजनीतिबाट आएका नेतालाई खेलकुद महासंघको जिम्मा लगाईएको थियो ।
तत्कालिन युवा संघका नेताहरुको बाहुल्यता रहेको सोही संगठन प्रधानमन्त्री ओलीको बचाउमा आईतबार सडक प्रर्दशनमा उत्रिएको छ । खेलकुदमा काम गर्ने संगठन राजनीतिक एजेण्डा सहित मैदान उत्रिएपछि यसको सर्वत्र विरोध भएको छ ।
त्रिपुरेश्वरस्थित सडक दशरथ रंगशालको मुख्य गेट गरि आयोजित कार्यक्रमलाई मुख्य वक्ताको रुपमा महासंघका अध्यक्ष पौडेलले सम्बोधन गरेका थिए । उनले सम्बोधनको दौरान सर्वोच्चका न्यायाधिशलाई चेतावनी दिदै अदालतको फैसला सेटिङ्गमा हुन सक्ने आशंका व्यक्त गरेका थिए । तर घरेलु खेलकुदका ज्वलन्त समस्यामा उनी मौन रहे ।
ओलम्पिक खेल्न बञ्चित गरिएका एथलेटिक्सका खेलाडी गोपीचन्द्र पार्की प्रकरणमा पौडेलले केही बोलेनन् । करिब ८ महिनाअघि ओलम्पिकमा छनोट भएको घोषणा गरिएका एथलेटिक्सका खेलाडी गोपीचन्द्र पार्कीलाई प्रतियोगिताको संघारमा जापान उड्ने टिमबाट निकालिएको छ । पार्की आफुमाथि अन्याय भएको भन्दै न्याय दिलाईदिन सार्वजनीक याचना गरिरहेका छन् । तर सत्तारुढ दलको खेलकुदको मुख्य संगठनले यस विषयमा अहिलेसम्म औपचारिक ध्यानाकर्षण समेत निकालेको छैन ।
पिडित खेलाडीले निष्पक्ष छानविन गरि आफुलाई न्याय दिलाईदिन बिलौना गरेका छन् । खेलकुदका मुख्य तीन निकाय राष्ट्रिय खेलकुद परिषद्, नेपाल ओलम्पिक कमिटी र नेपाल एथलेटिक्स संघले संयुक्त रुपमा बिज्ञप्ती जारी गर्दै पार्की प्रकरणलाई दबाएका छन् । तर खेलाडी र नेपाली खेलकुदको विषयमा राजनीति गर्ने संगठन खेलाडीमाथि भएको अन्यायमा मौनता साधेर राजनीतिक नारा सहित सडक तताएको हो ।
गठन लगत्तै महासंघले ‘कोभिड–नो भिड’ जस्ता अभियान सञ्चालन गरेर खेलकुद राजनीतिमा आफुलाई सक्रिय बनाएको थियो । तर आईतबार दलबल सहित हुल बाँधेर आफ्नै अभियानमा तातो पानी खनाउने काम गर्यो ।
प्राय निष्कृय बस्ने खेलकुदका राजनीतिक संगठनको माझ महासंघको पछिल्लो समयको सक्रियता लोभलाग्दो थियो । खेलाडी र खेलकुदमा राहतका लागि खेलकुद मन्त्रालयको ध्यानकर्षण गराउनेदेखि खेलकुदमा बजेट बढाउन अर्थ मन्त्रालयसम्म दबाब दिनेसम्मको नीतिगत सक्रियता महासंघले देखाएको थियो । खेलाडीलाई प्राथमिकतामा राख्दै कोभिडको खोप लगाउने कार्यक्रम महासंघले सञ्चालन गरेको थियो । थुप्रै स्थानमा कोभिड–१९ को रोकथामका लागि आवश्यक स्वास्थ्य सामाग्री वितरण समेत गरेको थियो ।
तर वर्तमान खेलकुदको भद्रगोल अवस्थादेखि ओलम्पिकबाट बञ्चित गरिएका गोपीचन्द्र प्रकरणमा महासंघले मौनता साध्यो । आफ्नै पार्टीको नियुक्तिबाट आएका राखेप सदस्य सचिव र पार्टी नेता समेत रहेका ओलम्पिक कमिटीका अध्यक्ष संलग्न प्रकरणमा महासंघले हस्तक्षप गर्न सकेन । बरु राजनीतिक नारा सहित सडक संघर्षमा उत्रिएर जग हसाँउने काम गरेको छ । यसले संगठनको शाखमात्र गिराएको छैन, खेलकुदको आवरणमा राजनीतिको सस्तो प्रहसनलाई उजागर गरेकाे छ ।
