काठमाडौं । कर्णाली प्रदेश सरकारले प्रदेश राजधानी वीरेन्द्रनगर सुर्खेतमा बन्ने प्रदेश रंगशाला निर्माण आयोजनालाई गौरवको आयोजनाको रुपमा घोषणा गरेको छ ।
प्रदेश मन्त्रीपरिषद्को पछिल्लाे बैठकले आर्थिक मामिला तथा योजना मन्त्रालयको प्रस्तावमाथि निर्णय गर्दै प्रदेश रंगशालालाई प्रदेशको गौरवको आयोजनाको रुपमा घोषणा गर्ने निर्णय गरेको हो ।
सरकारकी प्रवक्ता सीताकुमारी नेपालीले प्रदेश राजधानी वीरेन्द्रनगरमा बन्ने प्रदेश रंगशाला निर्माण आयोजनालाई प्रदेशको गौरवको आयोजना घोषणा गर्ने निर्णय भएको जानकारी दिईन् ।
संघीय सरकारले सातै प्रदेशमा सात रंगशाला बनाउने नीति तथा कार्यक्रममा उल्लेख गरेको छ । प्रधानमन्त्री केपी ओली नेतृत्वमा सरकार बनेपछि पहिलो बजेटमै यस कार्यक्रमलाई समावेश गरिएको हो । तर लामो समय बितिसक्दा समेत कर्णालीमा प्रदेश रंगशाला निर्माणको काम ठोस रुपमा अघि बढ्न सकेको थिएन । अन्य सबै प्रदेशमा रंगशाला निर्माणको काम र स्तरोन्नतीले गति लिएपनि पिछडिएको प्रदेश कर्णालीमा खेलकुदको पूर्वाधारको अवस्था निकै कमजोर छ ।
‘रंगशाला बनाउने भनेपनि बजेट नआउने अवस्था थियो । आएपनि सानो रकम आउने गर्यो । त्यही रकम समेत फ्रिज हुने अवस्था थियो ।’ प्रदेश खेलकुद विकास समितिमा सदस्य सचिव विश्वमित्र सञ्जेलले खेलपाटीसंग भने ।
प्रदेश खेलकुद विकास समितिको गठन र सदस्य सचिव नियुक्तिपछि रंगशाला निर्माण प्रस्तावको रुपमा अघि बढेको हो । रंगशाला निर्माणका लागि नयाँ आर्थिक वर्षमा मात्र प्रदेश सरकारले ३५ करोड रुपैयाँ बजेट विनियोजन गरेको छ ।
कर्णाली प्रदेश सरकारले पहिलो गौरवको आयोजनाको रुपमा रंगशाला बनाउने निर्णय गरेको हो ।
‘प्रदेशको सबैभन्दा पहिलो गौरवको आयोजना हो । अरु गौरवको आयोजना घोषणा भएका छैनन् ।’ सदस्य सचिव सञ्जेलले भने, ‘गौरवको आयोजना घोषणा भएपछि यसले पूर्णता पाउने दबाब बढ्छ । बजेटको कमी हुदैन । जस्तो अवस्थामा समेत बजेट आउने हुन्छ । गौरवको आयोजना भएपछि समयमै काम सम्पन्न गर्न सजिलो हुन्छ ।’
संघीय सरकारले रंगशाला निर्माणका लागि १ करोड ६९ लाख रुपैयाँ विनियोजन गरेको छ । सोही अनुसार कम्पाउन्ड निर्माणको काम भईरहेको छ ।
प्रदेश सरकारले रंगशाला निर्माणलाई गौरवको आयोजनाको रुपमा निर्णय गर्दै तीन आर्थिक वर्षभित्र सम्पन्न गर्नेगरि टेण्डर निकाल्ने तयारी गरेको छ ।
डीपीआर सहित रंगशाला निर्माणमा झण्डै दुई अर्ब खर्च हुने अनुमान गरिएको छ । वीरेन्द्रनगरको कुइनेपानीस्थित नगरविकासको ९ बिगाहा जग्गामा बन्ने रंगशाला खेलकुद विकास समितिलाई भोगचलन गर्न दिईएको हो ।
‘बहुवर्षिय योजनाका लागि स्रोत सुनिश्चितताका लागि प्रक्रिया अघि बढ्दैछ । यो महिनाभित्र टेण्डर निक्लने तयारी छ ।’ सदस्य सचिव सञ्जेलले भने ।
सरकारले दशौं राष्ट्रिय खेलकुद प्रतियोगिता कर्णाली प्रदेशमा आयोजना गर्ने तयारी गरेको छ । नवौं राष्ट्रिय खेलकुद यस वर्ष गण्डकी प्रदेशमा आयोजना हुदैछ ।
सदस्य सचिव सञ्जेलले गौरवको आयोजना घोषणा भएसंगै कर्णालीमा राष्ट्रिय खेलकुद आयोजना सुनिश्चित भएको बताए ।
‘खेलकुदको हिसाबले रंगशाला बन्नु महत्व भैहाल्यो । १० औं राष्ट्रिय खेलकुद आयोजना गर्ने भनेका छौं । सरकारको गौरवको आयोजना समेत भयो । यसले दशौं राष्ट्रिय खेलकुद आयोजना गर्न सक्छौं भन्ने सुनिश्चित गरेको छ ।’ उनले भने ।
