स्वर्णधारी ब्रियनाले टोकियो ओलम्पिक गुमाउने
एजेन्सी । रियो ओलम्पिकमा स्वर्ण विजेता हर्डल्स खेलाडी ब्रियना म्याकनिलले जापानमा आयोजना हुने टोकियो ओलम्पिक गुमाउने भएकी छिन् ।
खेलकुदको सर्वोच्च न्यायिक निकाय कोर्ट अफ आर्बिट्रेसन अफ स्पोर्टस (कास) ले प्रतिबन्धविरुद्धको अपिल खारेज गरेपछि ब्रियनाले ओलम्पिक गुमाउने भएकी हुन् ।
प्रतिबन्धित औषधि प्रयोग (एन्टी- डोपिङ) को नियम उलंघन गरेको कारण अमेरिकी खेलाडी ब्रियनालाई पाँच वर्षको प्रतिबन्ध गरिएको थियो ।
एथ्लेटिक्स इन्टीग्रिटी युनिटले एन्टी- डोपिङको नियम उलंघनमा दोषी पाईएको कारण प्रतिबन्ध गरिएको जनाएको छ ।
१२ महिनामा तीन पटक डोपिङ परिक्षणमा अनुपस्थित भएपछि उनीमाथि प्रतिबन्ध लागेको हो । यस अघि उनीमाथि अस्थायी निलम्बन गरिएको थियो ।
२९ वर्षिया ब्रियनाले रियो ओलम्पिकमा हर्डल्सको १०० मिटरमा स्वर्ण जितेकी थिइन् । यस्तै २०१३ को विश्व च्याम्पियनसिपमा स्वर्ण जितेकी थिइन् ।
