काठमाडौं । अखिल नेपाल फुटबल संघ (एन्फा)ले यस वर्षको ए डिभिजन लिग सञ्चालनका सम्बन्धमा क्लबहरुसंग आज (सोमबार) छलफल गर्दैछ ।
एन्फा लिग कमिटिका अनुसार एन्फा हेडक्वार्टरमा हुने छलफल दिउँसो २ बजे सुरु हुनेछ ।
कोरोना महामारीबाट प्रभावित बनेको लिगलाई सुरु गर्न एन्फाले ए डिभिजनका १४ क्लबलाई छलफलमा बोलाएको छ । बैठकले एन्फाले प्रस्ताव गरेको लिगको मिति, ढाँचा लगायत विभिन्न विषयमा निर्णय गर्नेछ ।
एन्फाले असोज ३ गतेबाट ए डिभिजन लिगको नयाँ सिजन सुरु गर्ने प्रस्ताव तयार पारेको छ ।
‘ए डिभिजनका १४ क्लबलाई बैठकमा बोलाएका छौं ।’ एन्फा लिग कमिटी निर्देशक संजिब मिश्रले खेलपाटीलाई भने, ‘बैठकले लिगको मिति टुङ्गो लगाउनुका साथै अन्य विभिन्न विषयमा सहमती जुटाउनेछ ।’
यस वर्षबाट एन्फाले शीर्ष डिभिजन लिगलाई लम्ब्याउने तयारी गरेको छ । यसअघि करिब ३ महिना शीर्ष डिभिजनको लिग सञ्चालन गर्दै आएको एन्फाले नयाँ सिजनबाट लिगको अवधि कम्तिमा ६ महिला पुर्याउने योजना बनाएको छ ।
कोरोनाको प्रभावका बीच एन्फाले यस वर्षको लिगलाई मोफसल समेत लैजाने प्रस्ताव गरेको छ । मनाङ लगायतका केही क्लब मोफसललाई आधार बनाउँदै लिग फुटबललाई अघि बढाउन चाहन्छन् । आजको बैठकले त्यस बिषयमा समेत ठोस निर्णय गर्ने बताईएको छ ।
कर्मा छिरिङ शेर्पा एन्फा नेतृत्वमा आएपछि ए डिभिजन लिगको तेस्रो सिजन सञ्चालन गर्न लागिएको हो ।
पहिलो सिजन बिना रेलिगेशनको लिग सञ्चालन गरेका शेर्पाले दोस्रो सिजन एक टिममात्र रेलिगेशनमा जाने लिग सञ्चालन गरेका थिए । तेस्रो वर्ष कोभिडका कारण लिग हुन सकेन ।
कोरोना प्रकोपका कारण अघिल्लो वर्ष ए डिभिजन लिगनै भएन । अघिल्लो वर्ष ए डिभिजन लिग आयोजना सम्भव नदेखिएपछि एन्फाले २०७६ मा पुरा हुन नसकेका कार्यक्रमलाई गत वर्ष समापन गरेको थियो ।
सोही अनुसार एन्फाले बी डिभिजन लिगका बाँकी खेल, सी डिभिजन लिग, महिला लिग, एन्फा प्रेसिडेन्ट लिग लगायतका कार्यक्रम पुरा गरेको थियो । घरेलु लिग सञ्चालन हुन नसकेको अवस्थामा एन्फाले यस वर्षको सुरुवातमा फुटबलको फ्रेन्चाईज प्रतियोगिता नेपाल सुपर लिग (एनएसएल) सञ्चालन गरेको थियो ।
आजको बैठकमा ए डिभिजनको मछिन्द्र, त्रिभुवन आर्मी, मनाङ मस्र्याङ्दी, थ्रीस्टार, नेपाल पुलिस, जावलाखेल, संकटा, न्युरोड टिम एनआरटी, च्यासल युथ क्लब, हिमालयन शेर्पा, फ्रेण्डस् क्लब, एपीएफ क्लब, व्रिगेड ब्वाईज क्लब र बढुवा भएको सातदोबाटो युथ क्लब सहभागी हुनेछन् ।
गत सिजन अन्तिम स्थानमा रहँदै सरस्वती युथ क्लब बी डिभिजनमा घटुवा भएको थियो । यस्तै बी डिभिजन लिगमा शीर्षस्थानमा रहँदै सातदोबाटो युथ क्लब ए डिभिजनमा बढुवा भएको थियो ।
