काठमाडौं । राष्ट्रिय फुटबल टिमका प्रशिक्षक अब्दुल्लाह अलमुताइरी नेपाल आईपुगेका छन् ।
विश्वकप छनोट अन्तर्गतका खेलहरु सकेर कुवेतमै रहेका अलमुताइरी शनिबार बिहान काठमाडौं आईपुगेका हुन् ।
अखिल नेपाल फुटबल संघ (एन्फा)का कार्यसमिति सदस्यद्धय मधुसुदन उपाध्याय र रुपेश अधिकारीले त्रिभुवन विमानस्थलमा अलमुताइरीलाई स्वागत गरेका थिए ।
विश्वकप छनोटको दोस्रो चरणका खेलहरु सकेर नेपाली टिम गत आईतबार स्वदेश फर्किसकेकाे छ । अलमुताइरी भने व्यक्तिगत कामका कारण कुवेतमा रहेका थिए ।
कुवेती प्रशिक्षक अलमुताइरीको नेतृत्वमा नेपालले विश्वकप छनोट अन्तर्गतका बाँकी खेल चाईनिज ताइपे, जोर्डन र अष्ट्रेलियासंग खेलेको थियो । उनकै पहलमा नेपालले विश्वकप छनोट अघि ईराकसंग मैत्रीपूर्ण फुटबल खेलेको थियो ।
प्रशिक्षकको जिम्मेवारी सम्हाले लगत्तै नयाँ तथा युवा खेलाडीलाई राष्ट्रिय टिममा समावेश गरेर चर्चामा आएर थिए, अलमुताइरी । राष्ट्रिय फुटबल टिमको खेल्ने शैली परिवर्तन गराएका थप चर्चा बटुलेका अलमुताइरीको आक्रमक फुटबल खेलाउने शैलीलाई समर्थकले मन पराएका छन् ।
नेपाली टिमका मुख्य व्यवस्थापक मधुसुदन उपाध्यायले नेपाल आए लगत्तै अलमुताइरी साफ च्याम्पियनसिपको तयारीमा जुट्ने बताउँछन् ।
'प्रशिक्षक केही दिन आराम गर्नु हुन्छ । त्यसपछि हामी साफको तयारीमा जुट्ने छौं । एन्फा टिम उहाँसंग साफ च्याम्पियनसिपको तयारीको विषयमा गृहकार्य गर्नेछ ।' उनले खेलपाटीसंग भने ।
