छनोट विवादमा छलफल गर्न तीन उपाध्यक्षको माग

काठमाडौं । अखिल नेपाल फुटबल संघ (एन्फा)का तीन उपाध्यक्षले यू–१३ छनोट विवादमा छलफल गर्न माग गरेका छन् ।

एन्फा वरिष्ठ उपाध्यक्ष पंकज विक्रम नेम्वाङ, उपाध्यक्षद्धय बीर बहादुर खड्का र कृष्ण थापाले युथ एकेडेमीका लागि खेलाडी छनोटको विषयमा बाहिरिएको विवादको विषयमा छलफल गर्न बैठकको माग गरेका छन् ।

एन्फा उपाध्यक्ष वीर बहादुर खड्काले एन्फालाई पत्र पठाएको केही दिन बितिसक्दा समेत कुनै जानकारी नआएको जानकारी दिएका छन् ।

‘पछिल्लो समय मिडियामा आएको विषयमा सत्यतथ्य के हो ? त्यसको विषयमा छलफल हुनु पर्यो भनेर हामीले एन्फाई पत्र पठाएका थियौ । तर, ४–५ दिन बितिसक्दा समेत अहिलेसम्म कुनै जानकारी आएको छैन् ।’ खड्काले भने, ‘हामीले बैठक बोलाएर आवश्यक परेको खण्डमा छानविन समिति गठन गर्नु पर्यो भन्ने हो । एन्फाभित्रको विषय बाहिरिएपछि त्यसको सत्यतथ्य पनि बाहिर ल्याउन आवश्यक छ ।’

उनले विवादीत बनेको यू–१३ छनोटको विषय कुनै एक व्यक्तिको मात्र नभई समग्र नेपाली फुटबलको रहेको बताए । छनोट विवादले सिंगो फुटबल संघको बदनाम हुन सक्ने उनको भनाई छ ।

‘जुन विषय बाहिरिएको छ, त्यो एक व्यक्तिको मात्रै हैन, पुरै संघको हो । यसको विषयमा छलफल हुनै पर्छ । एन्फाले तत्काल बैठक राख्नै पर्छ ।’ उनले भने ।

एन्फाका महासचिव इन्द्रमान तुलाधरले उपाध्यक्षको मागको विषयमा बैठकका लागि अध्यक्ष कर्मा छिरिङ शेर्पासँग छलफल भइरहेको जानकारी दिए ।

उनले यस विषयमा प्राविधिक कमिटिसँग पनि छलफल गर्नु पर्ने भएकाले समय लाग्न सक्ने बताए ।

‘हामी बैठकका लागि छलफल गर्दैछौ । अहिले कोरोना महामारी पनि छ । यो महामारी समयपछि बन्दाबन्दी खुलेपछि हामी विवादित विषयका लागि सबैलाई बैठकमा बोलाउने छौ ।’ महासचिव तुलाधरले भने ।

उपाध्यक्ष खड्काले बैठकका लागि बन्दाबन्दीनै खुल्नु पर्ने आवश्यकता नरहेको धारणा राखे । उनले भर्चुअल माध्यमबाट पनि बैठक बोलाउन सकिने जानकारी दिए ।

खड्काले एन्फा अध्यक्ष बन्दाबन्दीकै बीचमा उपत्यका बाहिर जान सक्ने, बैठक किन बोलाउन नसकिने भन्दै प्रश्न गरे ।

‘यसबीचमा एन्फा अध्यक्ष दुई पटक टोलीसहित पोखरा पुग्नु भयो । हेटौडा, विराटगनर पुग्न सकिने, उपत्यका बाहिर दैडिदा कोरोना नहुने ? बैठक बोलाउनका लागि बन्दाबन्दीको कारण हुने ?’ उनले भने, ‘यो एन्फाको छबीको विषय हो । यसलाई पनि प्राथमिकता दिन पर्दैन ?’

यसअघि एन्फाले गरेको यू–१३ खेलाडी छनोटमा संयोजकको हस्ताक्षरबिना खेलाडीको सुचि तयार पारिएको भन्दै विवादित बनेको थियो । छनोट समितिका संयोजक कृष्ण थापाले आफ्नो जानकारी विनै एन्फाले मनमानी तवरमा यू–१३ खेलाडीको सुचि तयार पार्दै सार्वजनिक गरेको आरोप लगाएका थिए ।

छनोट समितिमा सहभागी एक प्रशिक्षकले भने उपाध्यक्ष थापाले आफ्ना भान्जालाई निशुल्क छात्रवृत्तिमा राख्न निरन्तर दबाब दिएको खुलासा गरेका थिए । आफ्ना भतिज निशुल्क छात्रवृत्तिमा नपरेपछि उपाध्यक्ष थापाले हस्ताक्षरको विषयलाई उचालेर खेलाडी छनोटलाई विवादीत बनाएका थिए ।