काठमाडौं । नेपाल भलिबल संघले नेपाली महिला टिमको व्यवस्थापकमा निरोज मास्केलाई नियुक्त गरेको छ ।
संघको शुक्रबार बसेको भर्चुअल बोर्ड बैठकले मास्केलाई व्यवस्थापकको जिम्मेवारी दिएको हो ।
संघले आइतबार संघका उपाध्यक्ष समेत रहेकी मास्केलाई व्यवस्थापक नियुक्त गरेको पत्र पठाएको छ ।
नेपाली महिला टिमले फिलिपिन्समा आयोजना हुने एसियन सिनियर महिला भलिबल च्याम्पियनसिप खेल्दैछ ।
जसका लागि संघले मास्केलाई व्यवस्थापक नियुक्त गरेको हो ।
एसियन च्याम्पियनसिप आगामी अगष्ट २९ देखि सेप्टेम्बर ५ सम्म हुनेछ ।
प्रतियोगिताका लागि नेपाली महिला भलिबल टिमको बन्द प्रशिक्षण जेठ २१ गतेबाट सुरु हुनेछ ।
संघले ३० खेलाडीलाई बन्द प्रशिक्षणमा बोलाएको छ ।
गत महिना सम्पन्न पाँचौं संस्करणको आरबीबी एनभीए राष्ट्रिय महिला तथा पुरुष क्लब लिग भलिबल च्याम्पियनसिपमा उत्कृष्ट प्रदर्शन गर्ने ३० खेलाडीलाई प्रशिक्षणमा बोलाउने निर्णय गरेको हो ।
