आर्सनल अन्तिम चारमा

एजेन्सी । इंग्लिस क्लब आर्सनल युरोपा लिग फुटबलको सेमिफाइनलमा प्रवेश गरेको छ ।

बिहीबार राति क्वाटरफाइनलको दोस्रो लेगमा स्लाभिया प्रागलाई ४-० गोल अन्तरले पराजित गर्दै समग्रमा ५-१ को जितसहित आर्सनल अन्तिम चारमा पुगेको हो ।

आर्सनलले चेक रिपब्लिकको क्लबविरुद्ध पहिलो लेगमा १-१ गोलको बराबरी खेलेको थियो । तर, दोस्रो लेगमा एकतर्फी जित निकाल्यो ।

आर्सनललाई जित दिलाउन एलेक्स्जेन्ड्रा लाकाजेटले दुई गोल गरे । निकोलस पेपे र बोकायो साकाले एक एक गोल थपे ।

खेलको १८ औं मिनेटमा पेपेले गोल गर्दै आर्सनललाई अग्रता दिलाएका थिए ।

२१ औं मिनेटमा लाकाजेटले पेनाल्टीमा गोल गर्दै आर्सनललाई २-० को अग्रता दिलाए ।

खेलको २४ औं मिनेटमा साकाले गोल गर्दै टिमको अग्रता ३-० को बनाए ।

त्यसपछि खेलको ७७ औं मिनेटमा लाकाजेटले व्यक्तिगत दोस्रो गोल गर्दै आर्सनललाई ४-० को जित दिलाए ।

अब आर्सनलले सेमिफाइनलमा स्पेनिस क्लब भिल्ला रियलसँग खेल्नेछ ।

भिल्लाले डिनामो जेग्रेबलाई समग्रमा ३-१ ले हराएर अन्तिम चारमा स्थान पक्का गरेको हो ।