काठमाडौं । मुलपानी तेक्वान्दो डोजाङका आयुश ढुंगेलले काठमाडौं जिल्लास्तरीय तेक्वान्दो छनोट प्रतियोगितामा शुक्रबार स्वर्ण जितेका छन् ।
उनले पुरुष १४–१८ वर्ष उमेरसमूहमा स्वर्ण जितेका हुन् । उक्त स्पर्धाको महिलामा स्युचाटार तेक्वान्दो डोजाङकी मोनिका रम्तेल पहिलो भइन् ।
पेयर पुम्सेको १४–१८ वर्षमा चन्द्रसूर्य तेक्वान्दो डोजाङका हिमाला अधिकारी र योग्य राई विजेता बने । सोही उमेरसमूहको टिममा स्युचाटारका मोनिका मगर, स्मृति नेपाली र मोनिका रम्तेलले पहिलो स्थान हात पारे ।
त्रिपुरेश्वरस्थित राष्ट्रिय खेलकुद परिषद्को सेमि कभर्डहलमा भइरहेको प्रतियोगिताको पुरुष १८–२३ वर्षमा मुलपानीका पुष्पप्रसाद गौतम पहिलो भए । त्यसै स्पर्धाको महिलामा दीपज्योतिकी रंगिला रोक्का शीर्ष स्थानमा रहिन् ।
काठमाडौं जिल्ला तेक्वान्दो संघद्वारा आयोजित प्रतियोगितामा पुम्से ७ र ग्योरोगीमा १६ गरी २३ स्पर्धामा समावेश छन् । दुईदिने प्रतियोगितामा १७० पुरुष र १२० महिला गरी २ सय ९० खेलाडीको सहभागिता रहेको आयोजक संघका अध्यक्ष अशोक खड्काले जनाएका छन् ।
अध्यक्ष खड्काका अनुसार अबको छ महिनाको अवधिमा हुने विभिन्न प्रतियोगितामा काठमाडौं जिल्लाबाट सहभागी हुने खेलाडीको छनोट गर्न प्रतियोगिता आयोजना गरिएको हो । हरेक स्पर्धामा पहिलो हुने खेलाडी छनोट हुने प्रावधान छ ।
पहिलो दिनका विजयी खेलाडीलाई बागमती प्रदेश तेक्वान्दो संघका अध्यक्ष केशव पुरी, तेक्वान्दोका प्रमुख प्रशिक्षक नवीनकुमार श्रेष्ठलगायतले एक कार्यक्रमबीच पुरस्कृत गरे ।
