'बुटवल लुम्बिनी उपाधि दाबेदार टिम हो'

काठमाडौं । फ्रेन्चाइज फुटबल टिम बुटवल लुम्बिनी एफसीका अध्यक्ष राजकुमार तिमिल्सिनाले नेपाल सुपर लिग (एनएसएल) मा टिम उपाधि दाबेदार टिम भएको बताएका छन् ।

राजधानीमा शुक्रबार टिम सार्वजनिक गर्ने कार्यक्रममा बोल्दै अध्यक्ष तिमिल्सिनाले बुटवल लुम्बिनी एफसी उपाधि दाबेदार टिम भएका बताएका हुन् ।

'हामीले केही नयाँ रणनीति बनाएका छौँ । लिगमा सहभागी ७ टिम मध्ये बुटवल लुम्बिनी पनि एक दाबेदार टिम हो,' अध्यक्ष तिमिल्सिनाले भने ।

अध्यक्ष तिमिल्सिनाले क्लबसँग १८ खेलाडी अनुबन्धित भईसकेको समेत बताए । उनले अब दुई स्थानीय खेलाडी अनुबन्ध गर्न बाँकी रहेको बताए ।

'२० मध्ये १८ खेलाडी पूरा भएको छ । अब लोकल खेलाडी राख्न बाँकी रहेको छ,' उनले भने ।

अध्यक्ष तिमल्सिनाले खेलाडीलाई सोल्टी होटलमा राखेर प्रशिक्षण दिने समेत जानकारी गराए ।

कार्यक्रममा बुटवल लुम्बिनी एफसीले प्रतियोगिताका लागि तीन विदेशी खेलाडीसहित अक्सनबाट छनोट गरेको खेलाडी सार्वजनिक गरेको थियो ।

भारतको आईलिग खेलिसकेका अफ्रिकन खेलाडीलाई बुटवल लुम्बिनी एफसीले अनुबन्ध गरेको हो ।

घानाका ओपाकुकु विलियान ओलियम, नाइजेरियाका ओमुलाजा करिम र चाडका अर्माड बेअडुमलाई बुटवलले टिममा अनुबन्धित गरेको हो ।

पहिलो संकरणको लिगमा ७ फ्रेन्चाइज टिमको सहभागिता रहेको छ । लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

त्रिपुरेश्वरस्थित दशरथ रंगशालामा आयोजना हुने लिग बैशाख ११ गतेदेखि २५ गतेसम्म सञ्चालन हुनेछ ।

अखिल नेपाल फुटबल संघ (एन्फा) को प्राविधिक सहयोगमा हुने लिग राउण्ड रोबिनको आधारमा हुनेछ । लिगमा कुल १९ खेल हुनेछ ।