एनएसजेएफ एकेडेमीको औपचारिक सुरुवात

काठमाडौं । नेपाल खेलकुद पत्रकार मञ्चले एनएसजेएफ एकेडेमीको औपचारिक सुरुवात गरेको छ । काठमाडौंमा बुधबार विशेष समारोहको आयोजना गरेर मञ्चले एनएसजेएफ एकेडेमीको औपचारिक उद्घाटन गरेको हो ।

मञ्चले खेलकुद पत्रकारलाई तालिम, अनुसन्धान र मेन्टरसिपको प्रशिक्षण दिने उद्धेश्यका साथ एकेडेमीको औपचारिक सुरुवात गरिएको जनाएको छ । काठमाडौंका मुलधारका सञ्चारमाध्यममा काम गर्ने खेलकुद पत्रकारको साझा संस्था मञ्चले पत्रकारको व्यवसायीक क्षमताको अभिवृद्धि एकेडेमीमार्फत सञ्चालन गर्ने परियोजना सार्वजनीक गरेको हो । तालिम, अनुसन्धान र खेलको अभिलेखलाई एकेडेमीमार्फत काम गर्ने मञ्चको योजना छ ।

एनएसजेएफका अध्यक्ष दुर्गानाथ सुबेदीले खेल पत्रकारको व्यवसायीक वृद्धि विकासका लागि एकेडेमी फलदायी हुने बताए । उनले एकेडेमी मुख्य तीन विषय तालिम, अनुसन्धान र मेन्टरसिपमा केन्द्रित हुने धारणा राखे । ‘सरकार र खेलकुदका सरोकारवाला निकायको सहयोग बिना एकेडेमीको काम अघि बढाउन कठिन छ । एकेडेमीले खेलकुद क्षेत्रको विकासका लागि महत्वपुर्ण भुमिका खेल्नेछ ।’ उनले भने ।

युवा तथा खेलकुद मन्त्री दावा तामाङले एकेडेमीमार्फत गुणात्मक जनशक्ति विकास हुने विश्वास व्यक्त गरे । उनले सरकारको तर्फबाट गर्न सकिने साथ र सहयोग रहने प्रतिबद्धता जनाए ।

नेपाल ओलम्पिक कमिटिका अध्यक्ष जीवनराम श्रेष्ठले खेललाई विकास गर्न खेल पत्रकारको दक्षता समेत अभिवृद्धि गर्नुपर्ने बताए । ‘धेरै खेलको रिपोर्टिङ भएको छैन । समाचारमा खेलको विस्तृत विश्लेषण हुँदैन । अब एकेडेमीले समग्रतामा सिङ्गो खेलकुदलाई मद्दत गर्दछ । राम्रो भूमिका खेल्दछ । यसले खेलकुदलाई परिवर्तन गर्नेछ । ओलम्पिक कमिटि सहकार्य गर्न तयार छ ।’ उनले भने ।

मन्त्रालयका सचिव केदार न्यौपानेले एकेडेमीले आगामी दिनमा धेरै राम्रो काम गर्ने बताए । ‘खेलकुदको रिपोर्टिङ गर्दा खेललाई विश्लेषण गरेको कमै देखिन्छ । बाहिरको जस्तो सबै खेलको बिज्ञता नेपालमा पनि हुनुपर्छ । यसमा एकेडेमीले भुमिका खेल्ने विश्वास छ ।’ उनले भने ।

राखेप सदस्य सचिव रमेशकुमार सिलवालले खेलकुदको विधामा पत्रकारलाई प्राथमिकतामा राख्नुपर्ने धारणा राखे । खेल पत्रकारले मात्र खेलकुदको समाचार बुझ्ने उल्लेख गर्दै सदस्य सचिव सिलवालले खेलकुदका संघले पत्रकारलाई प्राविधिक कुरा बुझाउन जरुरी रहेको बताए ।

नेपाल ओलम्पिक कमिटिका पुर्व अध्यक्ष ध्रुव बहादुर प्रधानले अन्य एकेडेमी भन्दा एनएसजेएफले यसको महत्वलाई राम्रोसंग बुझाउन सक्ने धारणा राखे ।

एन्फा अध्यक्ष कर्माछिरिङ शेर्पाले नेपाल खेलकुद पत्रकार मञ्चसंग सहकार्य गर्दै खेल पत्रकारिताको विकासमा आफुहरु सहयोग गर्न तयार रहेको बताए ।

एनएसजेएफका महासचिव प्रज्वल ओलीले खेलकुद विकासमा खेल पत्रकारको दक्षता अभिवृद्धिको विषयले भुमिका खेल्ने धारणा राखे ।
कार्यक्रममा एनएसजेएफ एकेडेमीका संयोजक निरञ्जन अधिकारले एकेडेमीको औचित्य र आवश्यकता प्रष्ट पारेका थिए ।

खेलकुद क्षेत्रको सम्मानका लागि हरेक वर्ष स्पोर्टस अवार्ड आयोजना गर्दै आएको मञ्चले खेलकुद पत्रकारको क्षमता वृद्धि विकासका लागि एकेडेमी सञ्चालनमा ल्याएको हो । मञ्चले काठमाडौं र देशभरी गर्दै आएको प्रशिक्षण तथा अनुसन्धानका कार्यक्रमलाई एकेडेमी अन्तर्गत राखेर सञ्चालन गर्ने योजना सार्वजनीक गरेको हो ।