विशाल धनगढी एफसीको मार्की खेलाडी

काठमाडौं । राष्ट्रिय फुटबल टिमका सदस्य तथा मिडफिल्डर विशाल राई मार्की खेलाडीको रुपमा फ्रेन्चाइज टिम धनगढी एफसीमा अनुबन्धित भएका छन् ।

नेपाल सुपर लिग (एनएसएल) को फ्रेन्चाइज टिम धनगढीले सोमबार विशाललाई मार्की खेलाडीको रुपमा अनुबन्धित गरेको हो ।

धनगढीका टिम मालिक सुवास बहादुर शाही र विशालले सम्झौता पत्रमा हस्ताक्षर गरे ।

धनगढीका मार्की खेलाडी नियुक्त भएपछि बोल्दै विशालले टिमको लक्ष्य उपाधि उचाल्नु रहेको बताए ।

'टिमको मार्की खेलाडी हुन पाउँदा खुसी छु । हामी जित्नका लागि खेल्ने छौँ,' विशालले भने ।

राष्ट्रिय टिमका नियमित सदस्य विशाल मनाङ मर्स्याङ्दी क्लब र मछिन्द्र फुटबल क्लबबाट 'ए' डिभिजन लिग जितिसकेका छन् ।

पछिल्लो सिजन मछिन्द्रले लिगको उपाधि जित्दा विशाल टिमका मुख्य खेलाडी रहेका थिए ।

को हुन् विशाल ?

२७ वर्षे मिडफिल्डर विशालले राष्ट्रिय टिममा सन् २०१५ अगष्ट ३१ मा डेब्यु गरेका थिए ।

उनले नेपालका लागि १९ खेलमा ३ गोल गरिसकेका छन् । उनले माल्दिभ्स, लाओस र फिलिपिन्सविरुद्ध गोल गरेका थिए ।

नेपालले सन् २०१६ मा बंगबन्धु गोल्डकपको उपाधि जित्दा विशाल टिममा महत्वपूर्ण सदस्य थिए ।

यस्तै सन् २०१६ मा भएको १२ औं दक्षिण एसियाली खेलकुद र एएफसी सोलिडारिटी कपको उपाधि जित्दा विशाल टिममा रहेका थिए ।

विशालले वि.सं २०६६–६७ मा मछिन्द्रबाट खेल्दै सहिद स्मारक 'ए' डिभिजन लिगमा डेब्यु गरेका थिए ।

उनले वि.सं २०७० र २०७५ मा मनाङ मर्स्याङ्दी तथा २०७६ मा मछिन्द्र क्लबबाट लिगको उपाधि जितेका छन् ।

मछिन्द्रले पछिल्लो सिजन लिगको उपाधि जित्दा उनी उत्कृष्ट मिडफिल्डर चुनिएका थिए ।

यस्तै राष्ट्रिय लिग वि.सं २०७१–७२ मा मनाङबाट खेल्दा पनि उनी उत्कृष्ट मिडफिल्डर बनेका थिए ।

नेपाल स्पोर्टस म्यानेजमेन्टले आयोजना गर्ने पहिलो संकरणको लिगमा ७ फ्रेन्चाइज टिमको सहभागिता रहेको छ ।

लिगमा धनगढीसँगै विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, पोखरा थन्डर्स र बुटवल लुम्बिनी एफसी रहेका छन् ।

त्रिपुरेश्वरस्थित दशरथ रंगशालामा आयोजना हुने लिग बैशाख ११ गतेदेखि २५ गतेसम्म सञ्चालन हुनेछ ।

अखिल नेपाल फुटबल संघ (एन्फा) को प्राविधिक सहयोगमा हुने लिग राउण्ड रोबिनको आधारमा हुनेछ ।  लिगमा कुल १९ खेल हुनेछ ।

टिममा स्वदेशी र विदेशी खेलाडी राख्न पाइनेछ । खेलाडीको छनोट अक्सनबाट हुनेछ । अक्सनबाट हरेक टिमले विभिन्न श्रेणीबाट २० खेलाडी छनोट गर्नु पर्नेछ ।

लिगमा एक टिमले ३ विदेशी खेलाडी राख्न पाउने छन् । यस्तै दुई खेलाडीले प्लेईङ सेटमा रहेर खेल्न पाउने छन् ।