काठमाडौं । नेपाल ओलम्पिक कमिटि (एनओसी)ले नेपालमा आयोजना हुने १३ औं दक्षिण एसियाली खेलकुद (साग) को आयोजनाको तयारी र इन्डोनेसियामा सम्पन्न भएको एसियन गेम्सको समिक्षा गरेको छ ।
एनओसीले शुक्रबार सागको तयारीबारे छलफल गर्दै एसियन गेम्सको समिक्षा गरेको हो । छलफलमा एनओसीका पदाधिकारीहरुको उपस्थिति रहेको थियो ।
सातदोबाटोस्थित नेपाल ओलम्पिक कमिटि भवनमा बसेको छलफलमा एनओसीले सरकारसंग साग आयोजनाको लागि के बिषयमा ठोस निर्णय गर्ने भन्नेबारे छलफल गरेको थियो ।
एनओसीका अध्यक्ष जीवन राम श्रेष्ठले साग गेम्सबारे सरकारले प्रतिबद्दता जनाएको तर व्यवहारमा ढिला सुस्ती गरिरहेको बारे छलफल भएको खेलपाटीलाई बताए ।
'साग आयोजनाका लागि आवश्यक पर्ने तयारी र सुनिश्चितता गर्ने बिषयमा छलफल भयो,' अध्यक्ष श्रेष्ठले भने, 'सरकारबाट प्रतिबद्धता आएको छ तर व्यवहारमा देखिएन । अब सरकारसंग हुने ठोस बिषय के हो त्यसमा छलफल भयो ।'
यस्तै अध्यक्ष श्रेष्ठले एसियन गेम्समा नेपालको प्रदर्शनको समिक्षा भएको र प्रदर्शनलाई सुधार गर्नेबारे छलफल भएको बताए ।
