काठमाडौं । भक्तपुरमा यस वर्ष ‘हल अफ फेम’ खुल्ला फुटसल प्रतियोगिता माघ ३० गते आयोजना हुने भएको छ ।
स्थानीय खेलाडीको क्षमता अभिवृद्धि गर्दै राष्ट्रिय स्तरको खेलकुदमा योगदान पुर्याएका स्थानीय खेलाडीलाई सम्मान गर्ने उद्धेश्य अनुरुप चौथो संस्करणको हल अफ फेम फुटसल प्रतियोगिता माघ मसान्तमा आयोजना हुन लागेको हो ।
ख्वोपा फुटसलको आयोजनामा हुन लागेको कार्यक्रममा खुल्ला फुटसल सहित सामाजिक र खेलकुद क्षेत्रमा योगदान पुर्याएका विभिन्न ५ जनालाई सम्मान गर्ने कार्यक्रम रहेको छ ।
कार्यक्रमका संयोजक राम प्रजापतिले स्थानीय खेलाडीको क्षमता अभिवृद्धि गर्न र स्थानीय खेलाडीलाई सम्मान गर्ने उद्धेश्यले यस वर्षपनि कार्यक्रमलाई निरन्तरता दिन लागिएको बताए ।
‘स्थानीय खेलाडीलाई प्रतियोगितासंग जोड्न र पुराना खेलाडीलाई सम्मान गर्ने लक्ष्य सहित यस वर्षपनि कार्यक्रम गर्न लागेको हौं ।’ प्रजापतिले खेलपाटीसंग भने ।
‘खेलकुदमा योगदान पुर्याएका पुराना खेलाडी निराश अवस्थामा छन् । उनीहरुको योगदानलाई सम्मान गर्दै हल अफ फेमको रुपमा हरेक वर्ष कम्तिमा एक लिजेण्ड खेलाडीलाई सम्मान गर्दै आएका छौं । यसवर्ष समेत एक लिजेण्डरी खेलाडी सहित वर्षका उत्कृष्ट खेलाडीलाई सम्मान गर्दैछौं ।’ उनले भने ।
भक्तपुरको ख्वोपा फुटसल लिबालीमा हुने प्रतियोगितामा विभिन्न २४ टिमलाई सहभागी हुने बताईएको छ । माघ ३० गते उद्धघाटन हुने कार्यक्रम दुई दिनसम्म चल्नेछ ।
लिग कप नकआउटका आधारमा सञ्चालन हुने प्रतियोगिताको विजेता टिमले ५० हजार र दोस्रो हुने टिमले २० हजार रुपैयाँ प्राप्त गर्ने आयोजकले जनाएको छ ।
कार्यक्रममा विभिन्न क्षेत्रमा योगदान गर्ने ५ विधामा ब्यक्तित्वलाई सम्मान गर्ने कार्यक्रम समेत राखिएको छ ।
कोरोनाविरुद्धको लडाँईका नायकबाट एक जनालाई, वर्ष खेलाडीबाट एक पुरुष र एक महिला तथा एक लिजेण्ड खेलाडीलाई ‘हल अफ फेम प्लेयर अफ दी ईयर’बाट सम्मान गर्न लागिएको छ । कार्यक्रममा एक खेल पत्रकारलाई समेत सम्मान गरिने आयोजक ख्वोपा फुटसलले जनाएको छ ।
-1732413260.jpg)
