खेलग्राम बनाउन ८० पालिकालाई बजेट

काठमाडौं । युवा तथा खेलकुद मन्त्रालयले ८० वटा नयाँ पालिकामा खेलग्रामका लागि बजेट दिने निर्णय गरेको छ ।

मन्त्रालयको बैठकले प्राप्त प्रस्तावमाथि अध्ययन गरेर ८० वटा नयाँ पालिकामा बजेट रकम पठाउने निर्णय गरेको हो ।

मन्त्रालयले माघ ५ गतेसम्म खेलग्राम प्रस्तावका लागि सूचना जारी गरेको थियो ।

बैठकले ८० वटा नयाँ पालिकामा बजेट निकासा गर्दै गत वर्ष बजेट वितरण गरिएका ६० वटा पालिकालाई थप रकम उपलब्ध गराउने निर्णय गरेको हो ।
सरकारले चालू आर्थिक वर्षका लागि खेलग्राम निर्माणका लागि ४० करोड रुपैयाँ बजेट विनियोजन गरेको थियो ।

गत आर्थिक वर्ष मन्त्रालयले ८४ वटा स्थानीय पालिकालाई खेलग्रामका लागि बजेट निकासा गरेको थियो ।

मन्त्रालयले प्राप्त प्रस्तावमाथि अध्ययन गरेर ८० वटा नया“ पालिका छनोट गरिएको बताएको छ ।

‘चालु आर्थिक वर्षमा वित्तिय हस्तान्तरणमार्फत सम्बन्धित पालिकामा सिधै रकम जाने ब्यवस्था गरिएको छ ।’ मन्त्रालयका एक अधिकारीले खेलपाटीसंग भने ।

हरेक स्थानीय तहमा एक खेलग्राम बनाउने सरकारी घोषणा अनुसार मन्त्रालयले हरेक वर्ष बजेट विनियोजन गर्दै आएको छ ।

स्थानीय तह र संघीय सरकारको संयुक्त लगानीमा बन्ने खेलग्राममा स्थानीय तहले ३० प्रतिशत रकम सुनिश्चित गरेमा संघीय सरकारले ७० प्रतिशत रकम उपलब्ध गराउने उल्लेख छ ।

स्थानीय तहले पेश गरेको खेलग्रामको विस्तृत परियोजना रिपोटको प्रस्तावको अध्ययन गरेर मन्त्रालयले बजेट निकासा गर्ने गरेको छ ।