प्रशिक्षणकाे स्विकृती दिन राखेप तयार

काठमाडौं । खेलाडीलाई प्रशिक्षणकाे स्विकृती दिन राष्ट्रिय खेलकुद परिषद् (राखेप) तयार देखिएको छ ।

कोरोना भाईरसको महामारीका कारण झण्डै झण्डै ६ महिनादेखि बन्द रहेको प्रशिक्षणलाई सुरु गर्न राखेप तयार देखिएको हो ।

सरकारले लागू गरेको लामो समयको लकडाउन र निषेधाज्ञाले खेलकुद गतिविधि अघि बढाउने चुनौती राखेप समक्ष रहेको छ ।

राखेप सदस्य सचिव रमेशकुमार सिलवालले प्रशिक्षणको अनुमती दिन कुनै समस्या नभएको बताउँदै अर्को हप्तासम्म सबै खेलको प्रशिक्षण सुरु गर्ने गरि तयारी अघि बढेको खेलपाटीलाई बताए ।

‘प्रशिक्षणको स्विकृति दिन समस्या छैन ।’ सदस्य सचिव सिलवालले भने, ‘राष्ट्रिय स्तरका खेलाडीको प्रशिक्षण सुरु हुन गईरहेको छ । अर्को हप्ताबाट सबै खेलको प्रशिक्षण सुरु हुन्छ ।’

राखेपले सामाजिक दुरी कायम राख्दै सरकारको मापदण्ड र सम्बन्धित संस्थाको अन्तराष्ट्रिय मापदण्डलाई कायम राख्दै प्रशिक्षण सुरु गर्ने तयारी गरेको छ ।

‘सरकार र सम्बन्धित संस्थाको प्रोट्रोकल अनुसार प्रशिक्षण सुरु हुन्छ । खेलाडी र प्रशिक्षकलाई बन्द राखेर पनि भएन ।’ उनले भने, ‘विभागीय टिमलाई सुरु गर्न अनुरोध गरेका छौ । विस्तारै सुरु पनि भईरहेको छ ।’

सरकारले धेरै मानिसको भिडभाड हुने कार्यक्रम तथा खेल प्रतियोगितालाई तत्काल बन्द गर्ने निर्णय यथावत गरेको छ । सोही कारण खेलकुदको प्रशिक्षण सञ्चालन गर्न राखेपलाई कठिनाई भईरहेको छ ।

प्रशिक्षणका लागि चौतर्फी रुपमा दबाब आउन थालेपछि राखेप समेत सबै खेलकुदको प्रशिक्षणलाई सुरु गर्ने तयारीमा जुटेको हो ।

‘म दोहोरो मारमा छु । सरकारको निर्णयलाई पनि मान्न पर्नेछ । खेलाडीको भविष्यलाई पनि हेर्नुछ । सबै हिसाब गरेर अघि बढेको छु ।’ सदस्य सचिव सिलवालले भने ।

राखेप सदस्य सचिव सिलवालले सरकारको मापदण्ड पुरा गर्ने शर्तमा प्रशिक्षणका लागि अनुमती दिन आपत्ती नभएको बताए ।

‘केहीको औपचारिक पत्र दिएर र केहीको अनौपचारिक रुपमा अघि जाउ भनेको छु । हल्लाखल्ला नगरि प्रशिक्षण सुरु गर्न आवश्यक छ ।’ उनले भने ।

सदस्य सचिव सिलवालले स्वास्थ्य मापदण्ड पुरा गर्ने शर्तमा सम्बन्धित खेल संघलाई प्रशिक्षणका लागि स्विकृति दिन समस्या नभएको बताएका छन् ।

‘खेलमा सामाजिक दुरी कायम राख्नपर्यो । स्वास्थ्य मापदण्ड पालना गर्नपर्यो ।’ उनले भने, ‘तत्काल अभ्यास गर्ने र केही समयमा तालिका बनाएर प्रतियोगिता अघि बढाउन समस्या छैन । सरकारको स्वास्थ्य मापदण्ड पालना गर्नपर्छ, स्विकृती दिन गाह्रो छैन ।’