अर्जेन्टिनाको क्वार्टरफाइनल खेलमा पोर्चुगिज रेफ्री

काठमाडौं। अन्तिम १६ को खेलमा नाटकीय पुनरागमनभन्दा पनि फ्रान्सेली रेफ्री फ्राँस्वा लेटेक्सिएरका निर्णयका कारण चर्चामा आएका थिए।

अब अर्जेन्टिनाको अर्को खेलअघि रेफ्री को हुने भन्ने विषयमा धेरैको चासो थियो। स्विट्जरल्यान्डविरुद्ध हुने क्वार्टरफाइनल खेलको जिम्मेवारी पोर्चुगलका रेफ्री जोआँ पिन्हेइरोले पाएका छन्।

पिन्हेइरो खेल सुरु हुनुअघि नै आफ्नो रेफ्रिङ शैलीका कारण चर्चामा छन्। कारण, आफ्नो करिअरमा उनले करिब दुई हजार पहेँलो कार्ड देखाइसकेका छन्। ट्रान्सफरमार्कटको तथ्यांकअनुसार उनले हालसम्म एक हजार ९८५ वटा पहेँलो कार्ड दिएका छन्।

सन् २०१६ देखि अन्तर्राष्ट्रिय स्तरमा रेफ्रीको भूमिका निभाइरहेका ४७ वर्षीय पिन्हेइरोले हालसम्म ४४२ खेल खेलाएका छन्। यस अवधिमा उनले प्रतिखेल औसत ४.४९ वटा पहेँलो कार्ड देखाएका छन्।

यति मात्र होइन, उनले आफ्नो करिअरमा ८४ वटा रातो कार्ड पनि दिएका छन्, अर्थात् प्रतिखेल औसत ०.१९ रातो कार्ड। साथै उनले हालसम्म १४९ पेनाल्टी दिएका छन्।

यद्यपि, यस विश्वकपमा भने पिन्हेइरो अपेक्षाकृत संयमित देखिएका छन्। उनले प्रतियोगितामा अहिलेसम्म दुई खेल सञ्चालन गरेका छन्। समूह चरणमा बोस्नियाविरुद्ध स्विट्जरल्यान्डको ४–१ को जित र अन्तिम ३२ मा क्यानडाविरुद्ध दक्षिण अफ्रिकाको १–० को जितमा उनी मुख्य रेफ्री थिए।

बोस्नियाविरुद्धको खेलमा उनले विश्वकप करिअरकै पहिलो रातो कार्ड देखाएका थिए। साथै, इन्जुरी समयमा दिएको पेनाल्टीबाट ग्रानिट जाकाले गोल गरेका थिए। दुवै निर्णय स्विट्जरल्यान्डको पक्षमा गएका थिए। आगामी खेल भने अर्जेन्टिनाको उनको पहिलो रेफ्रिङ हुने छ।

पिन्हेइरोलाई मैदानमा उनका दुई पोर्चुगिज सहायक रेफ्री ब्रुनो जेसुस र लुसियानो माइयाले साथ दिनेछन्।

त्यसैगरी, चौथो अधिकारीका रूपमा क्यानडाका ड्रु फिसर रहनेछन् भने रिजर्भ सहायक रेफ्रीको जिम्मेवारी पनि क्यानडाकै माइकल बारवेगेनले सम्हाल्नेछन्।