मर्रे सिनसिनाटी ओपनको तेस्रो चरणमा

एजेन्सी । बेलायती खेलाडी एन्डी मर्रेले वेस्टर्न एण्ड साउदर्न (सिनसिनाटी) ओपनको तेस्रो चरणमा प्रवेश गरेका छन् ।

न्युयोर्कमा सोमबार राति भएको दोस्रो चरणको खेलमा एलेक्जेन्डर जेभरेभलाई पराजित गर्दै मर्रे तेस्रो चरणमा पुगेका हुन् ।

मर्रेले पाँचौ वरीयताका जर्मन खेलाडी जेभरेभलाई ६-३,३-६ र ७-५ को सेटमा पराजित गरे ।

सन् २०१७ पछि मर्रेले विश्व वरीयताको शीर्ष १० मा रहेका खेलाडीलाई पहिलोपटक हराएका हुन् ।

पूर्व विश्व नम्बर एक समेत रहेका मर्रेले लामो समयपछि प्रतिस्पर्धात्मक खेल खेलिरहेका छन् ।

हिप इन्जुरीको शल्यक्रियाको कारण २०१९ को नोभेम्बरपछि मर्रे यसै प्रतियोगिताबाट प्रतिस्पर्धात्मक खेलमा फर्किएका हुन् ।

मर्रेले यस प्रतियोगितालाई युएस ओपनको तयारीको रुपमा लिएका छन् । युएस ओपन अगस्ट ३१ बाट सुरु हुनेछ ।

३३ वर्षीय मर्रेले अब तेस्रो चरणमा क्यानाडाका मिलोस राओनिकसँग खेल्ने छन् ।

राओनिकले बेलायतका नम्बर एक खेलाडी डान इभान्सलाई हराएका थिए ।

महिलातर्फ बेलायतका नम्बर एक खेलाडी जोहान्ना कोन्टाले दोस्रो चरणमा बेल्जियमकी किर्स्टिन फ्लिपकेनलाई हराएकी छिन् ।

तेस्रो चरण पुग्ने क्रममा २९ वर्षीय कोन्टाले ६-२ र ६-० को जित निकालेकी थिईन् ।