पोखरा क्रिकेट मैदान समयमै बन्नेमा आशंका !

पोखरा । नवौं राष्ट्रिय खेलकुद प्रतियोगिता अघि पोखरा क्रिकेट मैदान बन्नेमा आशंका उत्पन्न भएको छ ।

समयमै काम सुरु हुन नसक्दा फागुनमा तय भएको नवौं राष्ट्रिय खेलकुद अघि मैदान निर्माणको काम सकिनेमा आशंका उत्पन्न भएको हो ।

सरकारले गण्डकी प्रदेशमा नवौं राष्ट्रिय खेलकुद प्रतियोगिता यस बर्षको फागुनमा आयोजना गर्ने तयारी गरेको छ ।

१३ औं दक्षिण एसियाली खेलकुद प्रतियोगिताका खेलहरु आयोजना गरेको गण्डकी प्रदेशले यसै बर्ष नवौं राष्ट्रिय खेलकुद प्रतियोगिता सञ्चालन गर्दैछ ।

तर पोखरास्थित क्रिकेट मैदान निर्माणको काम समयमा सुरु हुन नसक्दा क्रिकेटका खेलहरुनै प्रभावित हुने चिन्ता सरोकारवालाले ब्यक्त गरेका छन् ।

युवा तथा खेलकुद मन्त्रालयले चालू आर्थिक वर्ष २०७६÷७७ मा मैदान निर्माणका लागि ३ करोड रुपैयाँ बिनियोजन गरेको थियो । मैदानमा फोल्डिङ प्यारापिट, पोविलियन बक्स, शौचालय, मैदानको चारैतर्फ जाली लगाउने र ७ वटा पिच निर्माणका लागि सो रकम बिनियोजित गरिएको थियो ।

बजेट प्राप्त भएपनि समयमै टेण्डर आह्वान नहुँदा र काम सुरु नहुँदा नवौं राष्ट्रिय खेलकुद अघि मैदान तयार हुनेमा आशंका उत्पन्न भएको छ ।

दोस्रो पटक मैदान निर्माणका लागि निकालिएको टेन्डर मुल्याकनको चरणमा रहेको छ । पश्चिमाञ्चल क्षेत्रीय खेलकुद विकास समितीका इन्जिनियर प्रनिश ताम्राकारले तीन वटा कम्पनीले मैदान निर्माणका लागि टेण्डर हालेको र मुल्यांकनको चरणमा रहेको बताए ।

‘तीन कम्पनीले टेण्डर दिएको जानकारी आएको छ । अहिले राखेपले त्यसको मूल्याकंन गरिरहेको छ ।’ उनले खेलपाटीसँग भने, ‘कम्पनी छनौट भएपछि समयमै काम सकिने गरि प्रक्रिया अघि बढाउनेछौ ।’

जिल्ला क्रिकेट संघ कास्कीका अध्यक्ष संजयकान्त सिग्देल समयमा काम हुन नसक्दा मैदान निर्माणको काम पुरा हुनेमा शंका ब्यक्त गर्छन् ।

उनी मैदान निर्माणको अवधि वैशाखसम्म रहेको र त्यस भन्दा अगाडी निर्माण पुरा नहुने बताउँछन् । उनले आफुहरुले क्रिकेट मैदानको विकल्प समेत सोचेको बताएका छन् ।

‘अब वैशाख–जेठसम्म काम पर्छ । नवौं खेलकुदमा क्रिकेट कसरी गर्न सकिन्छ भनेर विकल्प पनि सोचेका छौं ।’ उनले भने, ‘समयमा मैदान तयार नभए सुरुमा मैदान भित्रको काम पुरा गर्छौ । र खेल आयोजना हुदै गर्दा मैदान बाहिरको काम सक्छौ ।’

उनले गण्डकी प्रदेशमा अन्य २ क्रिकेट मैदान बन्न सक्ने समेत उल्लेख गरेका छन् ।

सिग्देलका अनुसार पोखराको पशुपतीघाटस्थित क्रिकेट रंगशाला र नदिपुरमा गण्डकी प्रदेश सभा भवन पछाडी रहेको मैदानलाई समेत स्तरउन्नती गर्न सकिने उल्लेख गरे । १३ औं सागको समय सो मैदानलाई अभ्यास मैदानको रुपमा प्रयोग गरिएको थियो ।

१३ औं साग अन्तर्गत पोखरा क्रिकेट मैदानमा अस्थायी प्यारापिट राखेर महिला क्रिकेट आयोजना गरिएको थियो । सरकारले पोखरा क्रिकेट मैदानलाई अन्तर्राष्ट्रिय स्तरको रंगशाला बनाउने योजना अघि सारेको छ ।

सरकारले स्थायी प्यारापिट सहित बाँकी पुर्वाधार निर्माणका लागि बजेट समेत प्रदान गरेको हो । तर समयमा काम सुरु हुन नसक्दा निर्माण आयोजनानै प्रभावित हुने जोखिम देखिन्छ ।

समयमै निर्माण सम्पन्न गछौं – राखेप सदस्य गुरुङ

राखेप सदस्य राजेश गुरुङ भने समयमै मैदान निर्माण हुनेमा आशावादी छन् । उनले मैदान निर्माणका लागि कम्पनी छनौट भएपछि प्रत्यक्ष निगरानी राखेर समयमै मैदान निर्माण सम्पन्न गर्ने दावी गर्छन् ।

‘सरकारी काम भनेर ठग्ने बारे कसैले नसोचे हुन्छ । समयमै सम्पन्न हुने गरि काम लगाउछौ ।’ उनले भने, ‘सागको जसरी हतारमा काम गरेर धेरै त्रुटि हुन दिनेछैनौ । नवौं खेलकुद सभ्य र भव्य हुनेछ ।’

क्रिकेट मैदान निर्माणको कामलाई प्राथमिकतामा राखेको उल्लेख गर्दै गुरुङले यसलाई सम्पन्न गर्नेमा आफुहरु विश्वस्त रहेको बताए । उनले क्रिकेट मैदानसंगै स्विमिङ पुल, शुटिङ जस्ता खेलको पनि पुर्वाधार निर्माणका लागि शिघ्र टेण्डर आह्वान गरेर काम अघि बढाईने बताए ।

सदस्य गुरुङले लकडाउनका बिच पोखरा रंगशालामा वैकल्पिक मैदान निर्माणको काम पुरा गरेको जानकारी दिदै संघीय सरकारबाट स्विमिङ पुल निर्माणका लागि ५० लाख, पोखरा क्रिकेट मैदानका लागि २५ लाख, कभर्डहलका लागि १ करोड बजेट बिनियोजन गरिएको बताए ।