एन्फा निलम्बनविरुद्ध थापाको अपिल

काठमाठौं । अखिल नेपाल फुटबल संघ (एन्फा)को निलम्बनमा परेका ललितपुर जिल्ला फुटबल संघका अध्यक्ष पुरुषोत्तम थापाले राष्ट्रिय खेलकुद परिषद् (राखेप) मा अपिल गरेका छन् ।

एन्फाले गरेको निलम्बनको निर्णय विधान विपरित र त्रुटिपूर्ण रहेको भन्दै उनले राखेप सहितका निकायमा अपिल गरेका हुन् ।

उनले विधान र कानुनीविरुद्ध निलम्बन पत्रमा हस्ताक्षर गर्ने एन्फा महासचिवलाई कारबाही गर्न माग गर्दै राष्ट्रिय खेलकुद परिषद (राखेप) मा पत्र दर्ता गराएका छन् ।

सोही ब्यहोराका पत्र थापाले राखेपसहित, फिफा, एएफसी र एन्फाको अपिल कमिटिमा दर्ता गराएका छन् ।

एन्फा दिवसका दिन बरिष्ठ उपाध्यक्षले ए, बी र सी डिभिजन क्लबकोे भाईबर समूहमा दिएको शुभकामनामा संस्थागत मर्यादा र हित विपरित जवाफ दिएको भन्दै थापालाई एन्फाले स्पष्टिकरण सोधेको थियो ।

स्पष्टिकरण चित्त बुझ्दो नभएको भन्दै एन्फाको सचिवालय बैठकले साधारण सभासम्मका लागि निलम्बनको कारबाहि गरेको थियो ।

एन्फाले गरेको निलम्बन विधान विपरित र चुनावी प्रतिशोधको आधारमा रहेको भन्दै थापाले राखेपमा उजुरी गरेका छन् ।

‘आफुविरुद्ध भएको कारबाहिको विषयमा फिफा, एएफसी, राखेप र एन्फा कमिटीमा अपिल गरेको छु ।’ थापाले खेलपाटीसंग भने ।

‘सबैलाई अपिल पत्र पठाएको छु । सदस्य सचिव (रमेश सिलवाल) ज्यू मन्त्रालयमा पुग्नु भएका कारण उहाँकै अनुरोधमा प्रशासन प्रमुख कुल बहादुर थापालाई पत्र छाडेको छु ।’ बी डिभिजन क्लब झम्सिखेलका कोषाध्यक्ष तथा प्रशिक्षक थापाले भने ।

एन्फाको वर्तमान कार्यसमितिले बैशाख २२ गतेलाई एन्फा दिवस मनाउने निर्णय गरेका थियो । सोही दिन एन्फाको वर्तमान कार्यसमितिले निर्वाचन जितेको थियो ।

निलम्बनमा परेका थापाले एन्फा निर्वाचनमा वर्तमान कार्यसमिति विरुद्धको प्यानलबाट उम्मेद्वारी दिएका थिए । थापाले मणि कुँवर प्यानलबाट कार्यसमिति सदस्यमा चुनावी प्रतिस्पर्धा गरेका थिए ।

निर्वाचनमा पराजित भएपछि थापा सहित पराजित प्यानलका सदस्यहरु एन्फाको वर्तमान कार्यसमितिको निरन्तर विरोध गर्दै आएको छ ।

थापा नेतृत्वको ललितपुर, काठमाडौं, भक्तपुर र धादिङ जिल्ला फुटबल संघ वर्तमान एन्फा नेतृत्वको विरोध गर्दै आएका छन् ।

भाईबर ग्रुपमा थापाले दिएको जवाफलाई आधार मान्दै एन्फाले स्पष्टिकरण सोधेको थियो । दुई दिनपछि स्पष्टिकरण बुझाएका थापाले माफी सहित थप केही प्रश्न स्पष्टिकरण पत्रमा बुझाएका थिए ।

स्पष्टिकरण पत्रमा थप प्रश्न सोधेर बिषयलाई उत्तोजित बनाएको भन्दै एन्फाको सचिवालय बैठकले थापालाई निलम्बन गर्ने निर्णयमा पुगेको थियो ।

एन्फाले विधानको धारा ३ को उपधारा २ र धारा १४ को उपधारा १ (क) बमोजिम दायित्वको पालना नगरी जानी जानी नियतपुर्वक आफ्नो पुर्ववत जवाफ दिएको भन्दै निलम्बन गरेको प्रष्ट पारेको छ ।

एन्फाले विधानको धारा ३ को उपधारा २ र धारा ३६ उपधारा १४ बमोजिम कुनैपनि फुटबल गतिविधिमा संलग्न हुन नपाउने गरि साधारण सभासम्मका लागि अस्थायी निलम्बन गरेको थियो ।

थापा सहितका चार जिल्ला फुटबल संघले यसअघि एन्फामा व्यापक आर्थिक अनियमितता र भ्रष्टाचार रहेको भन्दै अख्तियार दुरुपयोग अनुसन्धान आयोग सहित विभिन्न निकायमा उजुरी दिएका थिए ।

सरकारले एन्फा भ्रष्टाचारको छानविन गर्न समितिनै गठन गरेको थियो । तर चार जिल्ला फुटबल संघले लगाएका १४ आरोप पुष्टि हुने आधार नभेटिएको भन्दै अख्तियारले एन्फालाई क्लिन चिट दिएको थियो ।