काठमाडौं । अखिल नेपाल फुटबल संघ (एन्फा)द्वारा निलम्बनको कारबाहीमा परेका ललितपुर जिल्ला फुटबल संघका अध्यक्ष पुरुषोत्तम थापाले पुर्वाग्रही तरिकाले कारबाही गरिएको बताएका छन् ।
एन्फाको निलम्बनबारे खेलपाटीसँग बोल्दै थापाले आफुलाई चुनावी प्रतिशोध साँधेर पुर्वाग्रही तरिकाले कारबाही गरिएको आरोप लगाए ।
‘चुनावी प्रतिशोध साँधेर कारबाही भयो । निलम्बन पुर्वाग्रही तरिकाले गरिएको छ ।’ झम्सिखेल युथ क्लबका प्रशिक्षक तथा कोषाध्यक्ष थापाले भने ।
एन्फा दिवसको दिन भाईबर ग्रुपमा वरिष्ठ उपाध्यक्षको शुभकामना सन्देशमा नकारात्मक टिप्पणी गरेको भन्दै एन्फाले थापासंग ४८ घण्टे स्पष्टिकरण सोधेको थियो ।
थापाले बुझाएको स्पष्टिकरण चित्त बुझ्दो नभएको भन्दै एन्फाले जेठ ५ गते आगामी साधारण सभासम्मका लागि निलम्बन गरेको छ ।
स्पष्टिकरण चित्त बुझ्दो नभएको बताउँदै एन्फाले दायित्वको पालना नगरी जानी जानी नियतपुर्वक आफ्नो पुर्ववत जवाफ दिएको भन्दै थापालाई निलम्बन गरिएको बताएको छ ।
एन्फाले फुटबल खेल र खेलसँग सम्बन्धित गतिविधिमा संलग्न हुन नपाउने गरी थापालाई साधारण सभासम्मका लागि अस्थायी निलम्बन गरेको हो ।
तर खेलपाटीसँग बोल्दै थापाले एन्फाले गरेको निलम्बन बिधान विपरित भएको बताएका छन् ।
‘एन्फाको निलम्बन विधान विपरित छ । निलम्बन कार्यसमितीले गर्न सक्छ । सचिवालयनले हैन ।’ उनले दाबी गरे ।
उनले जिल्ला फुटबल संघको नेतृत्वको पद एन्फाले टिका लगाएर नदिएको भन्दै कारबाही मान्य नहुने बताए ।
‘विधान अनुसार जाने हो भने म प्रजातान्त्रिक पद्धतीबाट अध्यक्ष भएर आएको हो । एन्फाले टिका लगाएर अध्यक्ष पद दिएको हैन । मलाई हटाउन ललितपुरका क्लबले चाहे सक्छन्, एन्फाले हैन ।’ ललितपुर जिल्ला अध्यक्ष थापाले भने ।
दुई बर्षअघि एन्फा निर्वाचनमा थापा वर्तमान एन्फा अध्यक्ष कर्माछिरिङ शेर्पा नेतृत्वको प्यानलबिरुद्ध चुनावी प्रतिस्पर्धामा उत्रिएका थिए । मणी कुँवर प्यानलबाट चुनावी प्रतिस्पर्धामा उत्रिएका उनी कार्यसमिति सदस्यमा पराजित भएका थिए ।
केन्द्रिय निर्वाचनमा कर्माछिरिङ शेर्पा नेतृत्वको प्यानलले विजयी हासिल गरेपछि ललितपुर जिल्ला फुटबल संघ सहित चार जिल्ला वर्तमान एन्फा नेतृत्वबिरुद्ध लागेका छन् ।
थापा सहितका चार जिल्ला फुटबल संघले एन्फामा चरम भ्रष्टाचार भएको आरोप लगाउँदै अख्तियार दुरुपयोग अनुसन्धान आयोग लगायतका सरोकारवाला संस्थामा उजुरी समेत दिएका थिए । तर अख्तियारले प्रमाण नपुग्ने भन्दै एन्फाको वर्तमान कार्यसमितिलाई क्लिन चिट दिएको थियो ।
एन्फा निर्वाचन लगत्तै विभिन्न आरोप लगाउँदै विरोधमा उत्रिएका चारै जिल्ला फुटबल संघलाई एन्फाले कारबाहीको तयारी गरेको छ ।
एन्फा निलम्बनमा परेका थापाले आफुलाई गरिएको कारबाहीको निर्णय देखाउन समेत चेतावनी दिएका छन् ।
‘एन्फाले बिधान अनुसार कार्य समितीले मलाई निलम्बन गर्न सक्छ । जसको निर्णय एन्फाले देखाओस् । मलाई कारबाही गर्दा अनुशासन कमिटीको भुमिका रहन्छ । सचिवालय पुग्यो होला तर कार्यसमितीबाट पास भएर कारबाही हुनुपर्ने हो ।’ थापाले भने ।
उनले आफुमाथि रचिएको षड्यन्त्रबिरुद्ध राष्ट्रिय खेलकुद परिषद् (राखेप) र एन्फाकै अपिल कमिटीमा समेत निवेदन दिने बताएका छन् ।
