बुटवल । रुपन्देही जिल्ला फुटबल संघले बुटवलको एन्फा टेक्निकल सेन्टरलाई कोरोनाबाट संक्रमितको उपचार गर्ने आईसोलेसन वार्ड बनाउन दिने भएको छ ।
प्रदेश सरकारको अनुरोधलाई स्विकार गर्दै जिल्ला फुटबल संघले बुटवलको एन्फा एकेडेमीलाई आईसोलेसन वार्ड बनाउन दिने भएको हो ।
प्रदेश नम्बर ५ मा कोरोनाबाट संक्रमितको संख्या बढेसंगै प्रदेश सरकारले बुटवल ११ स्थित देवीनगरमा रहेको एन्फा एकेडेमीको भवनलाई आईसोलेसनको रुपमा प्रयोग गर्ने प्रस्ताव गरेको थियो ।
‘प्रदेश सरकारको अनुरोधलाई स्विकार गर्दै टेक्निकल सेन्टरको भवनलाई कोरोना सक्रमितको उपचार गर्ने आईसोलेसनका लागि प्रयोग गर्न दिने सहमती बनेको हो ।’ एन्फा केन्द्रिय सदस्य तथा जिल्ला फुटबल संघका अध्यक्ष दिर्घबहादुर केसी (कुमार)ले खेलपाटीसंग भने ।
एकेडेमीलाई आईसोलेसन वार्डकाे रुपमा प्रयोग गर्न दिने गरि प्रदेश सरकार, स्थानीय प्रशासन र जिल्ला फुटबल संघबीच सहमती बनेको छ ।
टेक्निकल सेन्टरमा ३२ वटा कोठा रहेका छन् । एकेडेमीमा तत्काल ३२ जनालाई आईसोलेनमा राख्ने उपचार गर्न सकिने छ ।
एकेडेमीको क्षमता विस्तार गरेर ६४ जनालाई आईसोलेसनमा राखेर उपचार गराउने तयारी प्रदेश सरकारले राखेको अध्यक्ष केसीले जानकारी दिए ।
अखिल नेपाल फुटबल संघ (एन्फा)ले आफ्ना सम्पूर्ण भौतिक संरचनालाई कोरोना महामारीबिरुद्धको अभियानमा प्रयोग गर्न दिने घोषणा गरेको थियो ।
सोही अनुसार ललितपुरको केन्द्रिय एकेडेमी र रौतहटको महिला एकेडेमीको भवनलाई अस्थायी रुपमा क्वारेन्टाईनको रुपमा सरकारले प्रयोग गरेको छ ।
विगत ५ बर्षदेखि फुटबल गतिविधि ठप्प हुँदा मोफसलमा रहेका एन्फाका फुटबल एकेडेमी सञ्चालन हुन सकेका थिएनन् ।
तर पछिल्लो समय एकेडेमी सञ्चालनका लागि एन्फाले खेलाडी छनोट सहितका सम्पुर्ण प्रक्रिया पुरा गरेको थियो । तर एकेडेमी पुर्ण रुपमा सञ्चालनमा आउन नपाउँदै कोरोनाका कारण एकेडेमी सञ्चालनको कार्यक्रम स्थगित बनेको छ ।
