सागका पदकधारी प्रशिक्षकले पाए पुरस्कार

काठमाडौं । १३ औं दक्षिण एसियाली खेलकुद प्रतियोगिता (साग)का पदकधारी प्रशिक्षकले समेत नगद पुरस्कार प्राप्त गरेका छन् ।

युवा तथा खेलकुद मन्त्रालयले सागका विभिन्न खेल स्पर्धामा पदक जिताउने मुख्य प्रशिक्षक तथा सहायक प्रशिक्षकको पुरस्कार रकम सम्बन्धित ब्यक्तिको खातामा राखिदिएको हो ।

स्वर्ण पदक विजेता मुख्य प्रशिक्षकले ५ लाख, रजतले ३ लाख र कास्यले २ लाख रुपैयाँ प्राप्त गरेका छन् ।

यस्तै, स्वर्ण जित्ने सहायक प्रशिक्षकले ३ लाख, रजतले २ लाख र कास्यले १ लाख रुपैयाँ प्राप्त गरेका छन् ।

मन्त्रालयका प्रवक्ता मानबहादुर विकेले पदक विजेता ६८ जना प्रशिक्षक तथा सहायक प्रशिक्षकलाई १ करोड ८६ लाख रुपैयाँ सम्बन्धितको खातामा राखिएको बताएका छन् ।

पुरस्कार प्राप्त गर्न बाँकी रहेका प्रशिक्षक तथा सहायक प्रशिक्षकले भने कुनै पेश्की वा सरकारी बाँकी नरहेको व्यहोराको पत्र राष्ट्रिय खेलकुद परिषद् (राखेप)बाट आएपछि रकम भुक्तानी गरिने मन्त्रालयले जनाएको छ ।

मन्त्रालयले यसअघि परिषद्बाट पेश्की बाँकी नरहेको पत्र प्राप्त नगरेको भन्दै प्रशिक्षक र सहायक प्रशिक्षकको पुरस्कार रकम रोकेर राखेको थियो ।

मन्त्रालयले यस अघिनै सागका पदकधारी ४ सय ३५ खेलाडीलाई पुरस्कार वापतको १९ करोड ५३ लाख रुपैयाँ बैंक खातामा राखिदिएको छ ।

गत वर्षको मंसिर १५ देखि २४ सम्म काठमाडौं, पोखरा र जनकपुरमा भएको सागमा नेपालले ५१ स्वर्णसहित कूल २ सय ७ पदक जितेको थियो ।