काठमाडौं । उच्च पर्वतीय खेलकुद तालिम केन्द्र स्थापना गर्ने सरकारको घोषणालाई पर्वतीय खेलुकद महासंघ नेपालले स्वागत गरेको छ ।
सरकारले संसदमा पेश गरेको नयाँ आर्थिक बर्षको नीति तथा कार्यक्रममा उच्च पर्वतीय खेलकुद तालिम केन्द्र स्थापना गर्ने घोषणाले विश्वमा नेपालको खेल पहिचान बन्न सक्ने भन्दै महासंघले सरकारको कदमको स्वागत गरेको हो ।
नीति तथा कार्यक्रमको स्वागतमा एक बिज्ञप्ती जारी गर्दै महासंघले घोषणा गरे अनुसारको बजेट र विस्तृत योजना प्रस्तुत गर्न सरकारसंग माग गरेको छ ।
विगत लामो समयदेखि उच्च पर्वतीय खेलकुद पुर्वाधारमा सरकारले बजेट छुट्याएपनि ठोस कार्यक्रम अघि सारेको थिएन ।
नयाँ आर्थिक बर्षमा सरकारले उच्च पर्वतीय खेलकुद तालिम केन्द्र स्थापना गर्ने घोषणालाई नीति तथा कार्यक्रममा समावेश गरेसंगै पर्वतारोहण खेलकुद क्षेत्रमा लामो समयदेखि क्रियाशिल संस्था हौसिएका हुन् ।
सोही अनुसार महासंघले एक बिज्ञप्ती जारी गर्र्दै भूगोल, हावापानी, वातावरण र वस्तुस्थिती सुहाउँदो, शाहसिक पर्यटनको नेपाल पर्याय बन्न सक्ने भन्दै सरकारको नीति तथा कार्यक्रमले ‘माउन्टेन स्पोटर््स गेम’का लागि समेत कोशेर्ढुगा बन्न सक्ने उल्लेख गरिएको छ ।
प्रकृति, शाहसिक तथा सस्कृतिमा आधारित खेल स्पर्धाले नेपालको खेलकुद निर्वाहमुखी बन्ने सक्ने विश्वास महासंघले लिएको छ ।
नीजि क्षेत्रको खेलकुदमा रहेको लगानीलाई सरकारले पहिलो पटक सम्बोधन गरेको भन्दै महासंघले यसबाट नेपाली खेलकुद मेरुदण्ड नीजि क्षेत्रमा उत्साह थपिने बताएको छ । सोही अनुसार प्रशासनिक, आर्थिक र संरचनागत सुधार गर्न आवश्यक रहेको सरकारलाई जानकारी गराएको छ ।
महासंघका अध्यक्ष गोबिन्द भट्टराईले जारी गरेको बिज्ञप्ती अनुसार नेपालको पहिचान बनेको पर्वतीय पर्यटन, इको टुरिजम र जल पर्यटनमा नीति कार्यक्रम अमुर्त देखिएको भन्दै बजेटमार्फत यसलाई प्रष्ट गर्न सरकारसंग अनुरोध गरिएको छ ।
सरकारले नयाँ आर्थिक बर्षको बजेटमा उच्च पर्वतीय खेलकुद पुर्वाधार निर्माणलाई उच्च प्राथमिकता दिने उल्लेख गर्दै नीति तथा कार्यक्रम प्रस्तुत गरेको छ ।
सोही नीति तथा कार्यक्रममा आधारित रहेर सरकारले जेठ १५ गते संसदमा आगामी आर्थिक बर्षको बजेट प्रस्तुत गर्नेछ ।
