काठमाडौं । अखिल नेपाल फुटबल संघ एन्फाले दुर्घटनामा परि आँखा गुमाएकी महिला फुटबलर समिक्षा थापा मगरको सम्पूर्ण उपचार खर्च ब्यहोर्ने भएको छ ।
प्रारम्भिक रुपमा उपचार खर्च वापत २५ हजार रुपैयाँ दिएको एन्फाले समिक्षाको उपचारमा लाग्ने सम्पूर्ण खर्च ब्यहोर्ने निर्णय लिएको हो ।
'दुर्घटनाको खबर प्राप्त हुने बित्तिकै एन्फाले सुरुवातमै २५ हजार रुपैयाँ सहयोग गरेको थियौ । पारिवारिक अवस्था कमजोर भएको हुनाले सबै खर्च संघले ब्यहोर्ने निर्णय भएको छ ।' एन्फा प्रवक्ता किरण राईले खेलपाटीसग भने ।
उदयपुरस्थित घरको खेतमा काम गर्ने क्रममा ढुङ्गाले लागेर समिक्षाले दाँया आँखा गुमाएकी थिईन् । उनको विराटनगरस्थित आँखा अस्पतालमा उपचार भईरहेको छ । उनको आँखाको सल्यक्रिया गर्ने तयारी छ ।
'आँखामा चोटको संक्रमण फैलिएकाले तत्काल सल्यक्रिया सम्भव देखिएको छैन । केही दिनमा संक्रमण नियन्त्रणमा आएपछि सल्यक्रिया गर्ने चिकित्सकले बताएका छन् ।' आईतबार समिक्षालाई भेटर फर्किएका प्रवक्ता राईले भने ।
प्रवक्ता राईले समिक्षाको उपचारमा एन्फा संवेदनशिल रहेको बताउँदै आवश्यक पर्ने सबै सहयोग गर्ने बताए ।
आर्थिक अवस्था कमजोर भएकी समिक्षालाई व्यक्तिगत तथा संस्थागत रुपमा समेत सहयोग प्राप्त हुने क्रम जारी छ । यसअघि समिक्षाको उपचारमा एन्फा सहित विराट सांग्रिला क्लब, राष्ट्रिय महिला तथा पुरुष टिम र मनाङ मस्र्याङ्दी फुटबल क्लब लगायतले आर्थिक सहयोग गरेका थिए ।
विराटनगरका मेयरको सहयोग
उपचाररत समिक्षालाई विराटनगर महानगरका प्रमुख भिम पराजुलीले समेत आर्थिक सहयोग गरेका छन् ।
उनले समिक्षाको उपचारमा व्यक्तिगत रुपमा २५ हजार रुपैयाँ सहयोग दिने बताएका हुन् ।
उनले थप आवश्यक सहयोग गर्ने प्रतिबद्धता व्यक्त गर्दै रकम परिवारलाई हस्तान्तरण गरेका छन् ।
