काठमाडौं । कोरोना भाईरसबाट प्रभावित खेलाडी तथा क्याडीहरुलाई नेपाल गल्फ संघले सहयोग गर्ने भएका छन् ।
संघले शुक्रबार प्रेस विज्ञप्ति निकाल्दै कोरोनाको कारण लकडाउन भएपछि दैनिक गुजारा गर्न समस्या भएका खेलाडी र क्याडीलाई सहयोग गर्ने जनाएको छ ।
संघले लकडाउनको कारण दैनिक गुजारा गर्न समस्या भएमा संघसँग सम्पर्क गर्न खेलाडी र क्याडीलाई अनुरोध गरेको छ ।
'कोरोना भाईरसको कारण देश लकडाउनमा छ र गल्फ खेल रोकिदा खेलाडी र क्याडीलाई प्रत्यक्ष असर परेको छ । देशभरिका गल्फ खेलाडी र क्याडीलाई खानाको समस्या भएमा संघले सहयोग गर्ने छ,' संघले जारी गरेको विज्ञप्तिमा भनिएको छ, 'दैनिक गुजारा गर्न समस्या भएका खेलाडी र क्याडीलाई निम्न ब्यक्तिहरुलाई सम्पर्क गर्न संघ अनुरोध गर्दछ ।'
संघले सहयोगका लागि रोयल नेपाल गल्फ क्लबका दीपक थापामगर (९८५१०९६६८६) गोकर्ण गल्फ क्लबका उपेन्द्र खड्का (९८४१७७०७७७), हिमालयन गल्फ कोर्स (पोखरा) का भु बहादुर गुरुङ ( ९८५६०२११५०) र धरान गल्फ क्लबका जितेन्द्र राई (९८१३२६४६४२) लाई सम्पर्क गर्न अनुरोध गरेको छ ।
सरकारले कोरोनाबाट बच्न बिगत एक महिनाबाट लकडाउन गरेको छ । लकडाउनको कारण मानिसहरू अत्यावश्यकबाहेक अन्य कामका लागि बाहिर निस्किन पाएका छैनन् ।
