एन्फाले यस वर्ष 'एन्फा दिवस' नमनाउने

काठमाडौं । नेपाली फुटबलको सर्वोच्च निकाय अखिल नेपाल फुटबल संघ (एन्फा) ले यस वर्ष ‘एन्फा दिवस’ नमनाउने भएको छ ।

विश्वभर महामारीको रुपमा फैलिएको कोरोना भाईरस (कोभिड-१९) का कारण एन्फाले वार्षिक रुपमा मनाउँदै आएको ‘एन्फा दिवस’ यस वर्ष नमनाउने भएको हो ।

एन्फाले गत वर्षबाट बैशाख २२ गतेलाई एन्फा दिवसको रुपमा मनाउन थालेको थियो । क्यालेन्डरमा समावेश गर्दै वार्षिक रुपमा एन्फा दिवस मनाउने बताएको एन्फाले कोरोनाको कारण यस पटक रोकिने जनाएको छ ।

‘कोरोना भाईरसकै कारण यस पटकको एन्फा दिवस प्रभावित भएको छ । यस पटक दिवस मनाउने छैनौ,’ एन्फाका प्रवक्ता किरण राईले खेलपाटीसँग भने ।

गतवर्ष एन्फाले आफ्नो दिवसको अवसरमा फुटबलमा विशेष योगदान पुर्याएको भन्दै पुरुषतर्फ पूर्व राष्ट्रिय टिमका स्ट्राइकर जुमानु राई र महिलातर्फ पूर्व कप्तान अनु लामालाई सम्मान गरेको थियो ।

यस्तै उदयीमान खेलाडीमा पुरुषतर्फ राष्ट्रिय टिमका अभिषेक रिजाल र महिलातर्फ मञ्जली कुमारी योञ्जनलाई सम्मान गरेको थियो ।

तत्काललाई स्थगित भएको दिवसपछि गर्ने वा नगर्ने भनेर एन्फाले कोरोना न्युनिकरण भएपछि निर्णय लिने बताएको छ ।

‘हामीले अहिलेनै निर्णय लिएका छैनौं । यो महामारी कम भएपछि मिति तय गर्नेछौं,’ राईले थपे ।

गत वर्ष उत्कृष्ट प्रशिक्षकको अवार्ड तत्कालिन महिला टिमका प्रशिक्षक हरि खड्कालाई प्रदान गरिएको थियो ।

लाइफटाइम अचिभमेन्ट अवार्ड भागिरथ आलले पाएका थिए ।

पुरुषतर्फ पूर्व फिफा रेफ्री लव खत्री र महिलातर्फ अस्मिता मानन्धर उत्कृष्ट चुनिएका थिए ।

विदेशी भूमिमा उत्कृष्ट प्रदर्शन गर्न खेलाडीमा गोलरक्षक किरण लिम्बु र रोहित चन्द घोषित भएका थिए ।