लकडाउनपछि खेलाडीलाई दिईने प्रशिक्षणबारे छलफल

काठमाडौं । विश्वभर महामारीको रुपमा फैलिएको कोरोना भाईरसको कारण नेपाल सरकारले पछिल्लो एक महिनाबाट लकडाउन गरेको छ ।

लकडाउनको कारण नेपाली खेलकुद पूर्ण रुपमा ठप्प बनेको छ । खेलाडीहरु घरमै बसिरहेका छन् भने उनीहरुको प्रशिक्षण तथा अभ्यास पूर्ण रुपमा ठप्प भएको छ ।

लकडाउनले रोकिएको खेलाडीको प्रशिक्षणको सुचारु र कसरी खेलाडीलाई प्रशिक्षण गराउने भन्ने विषयमा बिहिबार नेपाल ओलम्पिक कमिटि (एनओसी) ले छलफल गरेको छ ।

एनओसीले भिडियो कलमार्फत लकडाउनको अवस्था र लकडाउन पछिका दिनका खेलाडीलाई कसरी प्रशिक्षण गराउने भन्ने विषयमा मानार्थ अध्यक्ष, सल्लाहकारहरु र कमिसनका अध्यक्षहरुसँग छलफल गरेको हो ।

बैठकले जापान ओलम्पिकका लागि वाइल्ड कार्डमा सहभागी र अन्य उत्कृष्ट खेलाडीहरुलाई उपयुक्त योजना बनाई प्रशिक्षण दिने निर्णय गरेको छ ।

यस्तै तत्काल ओलम्पिक कमिटीका सबै सदस्यहरूलाई एकदिनको अनलाइन मनोवैज्ञानिक कक्षा दिने निर्णय गरेको छ ।

यस अघि एनओसीले खेलाडीको लागि १ हप्ताको मनोवैज्ञानिक कक्षा संचालन गरेको थियो ।