संकटमा परेका विदेशी फुटबलरलाई एन्फाको राहत

काठमाडौं । अखिल नेपाल फुटबल संघ (एन्फा)ले घरेलु फुटबल खेल्दै आएका विदेशी खेलाडी तथा प्रशिक्षकलाई राहत वितरण गरेको छ ।

कोरोना भाईरसको महामारीबाट घरेलु फुटबल अवरुद्ध बनेपछि बेरोजगार बनेका २८ विदेशी खेलाडी तथा प्रशिक्षकलाई एन्फाले दैनिक उपभोग्य बस्तु वितरण गरेको हो ।

सहिद स्मारक ए डिभिजन लिगको दौरान विभिन्न क्लबबाट खेल्दै आएका खेलाडी तथा प्रशिक्षकलाई राहत वितरण गरिएको एन्फाले जनाएको छ ।

करिब पछिल्लो एक महिनादेखि सरकारले लकडाउनको घोषणा गरेपछि देशभरको जनजिवन प्रभावित बनेको छ । सोही अवस्थामा आर्थिक संकट ब्यहोरेका विदेशी खेलाडी तथा प्रशिक्षकलाई एन्फाले राहत दिएको हो ।

एन्फाले आफ्नै साधनमा राहत बोकेर उपत्यकाका विभिन्न स्थानमा पुगेर खेलाडीलाई राहत वितरण गरेको जनाएकाे छ । 

एन्फाले यसअघिनै आफ्ना दुई एम्बुलेन्स ललितपुर महानगरलाई कोरानाबिरुद्धको अभियानमा प्रयोग गर्न दिईसकेको छ ।

यस्तै, एन्फाले प्रदेश २ को रौतहटमा रहेको महिला फुटबल एकेडेमी सरकारलाई क्वारेन्टाईनको रुपमा प्रयोग गर्न दिएको छ ।