जुडो संघको निर्वाचन स्थगित

काठमाडौं । नयाँ नेतृत्व चयनका लागि यसै साता हुने भनिएको नेपाल जुडो संघको केन्द्रिय निर्वाचन स्थगित भएको छ ।

संघले बिहिबार एक विज्ञप्ति निकाल्दै कोरोना भाईरसको महामारीको कारण बैशाख ६ गते हुने भनिएको निर्वाचन स्थगित भएको जनाएको छ ।

विश्वभर फैलिएको महामारीको रुपमा फैलिएको कोरोनाबाट सुरक्षित रहन सरकार र राष्ट्रिय खेलकुद परिषद (राखेप) ले सभा, सम्मेलन, गोष्ठी नगर्न सूचना जारी भएको कारण साधारणसभा स्थगित गरिएको संघका अध्यक्ष दिपक हर्ष बज्राचार्यले जारी गरेको विज्ञप्तिमा भनिएको छ ।

संघले साधारणसभा अवस्था सामान्य भएपछि बस्ने बैठकले तय गर्ने समेत जनाएको छ ।

'सरकार र राष्ट्रिय खेलकुद परिषद (राखेप) ले सभा, सम्मेलन, गोष्ठी नगर्न सूचना जारी भएको व्यहोरा सबैलाई ज्ञात नै छ,' विज्ञप्तिमा भनिएको छ, 'यस्तो अवस्थामा संघको जिल्ला र केन्द्रिय स्तरको साधारणसभा तथा यस संघको नियमित बैठक समेत गर्न सम्भव नभएकोले यस संघको जिल्ला र केन्द्रिय स्तरको साधारणसभा हाललाई स्थगित गर्ने र अवस्था सामान्य भएपछि बैठक बसी उपयुक्त समयमा साधारणसभा गरिने व्यहोरा सूचित गरिन्छ ।'

कोरोनालाई मध्येनजर गर्दै सरकारले बैशाख १५ गतेसम्म लकडाउनको घोषणा गरेको छ । नेपालमा १६ जनाको कोरोनाको संक्रमण देखिएको छ ।

कोरोनाको कारण यस अघि चैत २९ गते हुने भनिएको नेपाल आर्चरी संघको निर्वाचन समेत स्थगित भएको थियो ।