काठमाडौं । युवा तथा खेलकुद मन्त्रालयले १३ औं दक्षिण एसियाली खेलकुद प्रतियोगिता (साग)का पदकधारी खेलाडीको पुरस्कार रकम सम्बन्धित खेलाडीको बैंक खातामा जम्मा गरिएको जनाएको छ ।
मन्त्रालयले प्रेस बिज्ञप्ती जारी गर्दै कोरोनाको संक्रमणका कारण औपचारिक समारोह आयोजना गरेर पुरस्कार वितरण गर्न नसकिएको भन्दै पदक प्राप्त गर्ने ४ सय ३५ खेलाडीको खातामा पुरस्कार वापतको रकम जम्मा गरिएको बताएको हो ।
मन्त्रालयले सम्बन्धित खेलाडीले आ आफ्नो बैंक खाता चेक गरी पुरस्कार रकम पाएको निश्चित गर्न अनुरोध समेत गरेको छ ।
मन्त्रालयले रकम जम्मा नभएको वा अन्यथा भएको अवस्थामा राष्ट्रिय खेलकुद परिषद् तथा साग सचिवालयका प्रमुख कमल खनाल तथा मन्त्रालयका उपसचिव नवराज घिमिरेलाई सम्पर्क गरेर जानकारी लिन आग्रह गरेको छ ।
खेलाडीको सम्मानपत्र भने संक्रमणबाट अवस्था सामान्य भएपछि उपलब्ध गराईने मन्त्रालयको भनाई छ ।
मन्त्रालयले प्रशिक्षक, सहायक प्रशिक्षक र खेल संघ संस्थाको हकमा भने पेश्की वा सरकारी रकम बाँकी नभएको व्यहोराको पत्र राखेपबाट प्राप्त भएपछि भुक्तानी गर्ने जनाएको छ ।
खेलाडीको खातामा पुरस्कार रकम जम्मा भएपनि प्रशिक्षक र सम्बन्धित संघले पुरस्कारका लागि अझै केही समय पर्खनुपर्ने भएको हो ।
सरकारले प्रतियोगिता अन्तर्गत विभिन्न खेलका व्यवस्थापक (म्यानेजर)लाई भने पुरस्कार रकम नदिने भएको छ । मन्त्रालयले प्रस्ताव गरेको रकम अर्थ मन्त्रालयले कटौती गरेसंगै सबै खेलका म्यानेजर रकमबाट पुरस्कृत नहुने भएका हुन् ।
सरकारले प्रतियोगिता आयोजना भएको झण्डै चार महिना भन्दा बढी समयपछि खेलाडीको खातामा पुरस्कार वापतको रकम जम्मा गरिदिएको हो ।
समयमै पुरस्कार रकम नपाएको भन्दै खेलाडीले सरकारसंग असन्तुष्टि जनाउँदै आएका थिए ।
सम्पर्क नम्बर सहितकाे बिज्ञप्ती :
