काठमाडौं । नेपालमा सम्पन्न १३ औं दक्षिण एसियाली खेलकुद प्रतियोगिता (साग) मा पदक जित्ने नेपाली खेलाडीले नगद पुरस्कार पाउन थालेका छन् ।
गत मंसिरमा आयोजना भएको सागका पदकधारीले आइतबारबाट सरकारले घोषणा गरेको नगद पुरस्कार पाउन थालेका हुन् ।
युवा तथा खेलकुद मन्त्रालयले सरकारले घोषणा गरेको पुरस्कार खेलाडीको व्यक्तिगत बैंक खातामा पठाउन सुरु गरिएको जनाएको छ ।
मन्त्रालयका लेखा शाखा प्रमुख नवराज घिमिरेले मंगलबारसम्म १ सय ७९ खेलाडीले नगद पुरस्कार पाईसकेको र बाँकीले बुधबारसम्म पाईसक्ने जानकारी दिए ।
'आइतबारबाट खेलाडीको पैसा पठाउन सुरु भएको थियो । बैंकको सर्भरले गर्दा सबैलाई पैसा पठाउन सकेनौं । १ सय ७९ खेलाडीले पुरस्कार पाईसकेका छन् । बाँकीको बुधबार खातामा पैसा पुग्नेछ,' घिमिरेले खेलपाटीसँग भने ।
काठमाडौं पोखरा र जनकपुरमा भएको सागमा नेपालले ५१ स्वर्ण, ६० रजत र ९६ कास्य पदक गरी २ सय ७ पदक जितेको थियो ।
साग सकिएको भोलीपल्टै (मंसिर २५) गते बालुवाटारमा कार्यक्रमको आयोजना गरेर प्रधानमन्त्री केपी शर्मा ओलीले पुरस्कार रकम घोषणा गरेका थिए ।
सरकारले व्यक्तिगत स्पर्धाका स्वर्ण पदक विजेतालाई ९ लाख, रजत जित्नेलाई ६ लाख र कास्य जित्नेलाई ३ लाख रुपैयाँ दिने घोषणा गरेको थियो । यस्तै एक भन्दा बढी स्वर्ण जित्ने खेलाडीलाई ११ लाखका दरले पुरस्कार रकम दिने सरकारको घोषणा गरेको थियो ।
त्यस्तै टिम ईभेन्ट्सका स्वर्णधारी खेलाडीले ६ लाख, रजतले ४ र कास्य जित्नेले २ लाख पाउने छन् । स्वर्ण जिताउने मुख्य प्रशिक्षकले ५ लाख, रजतले ३ र कास्यले २ लाख पाउने छन् । सहायक प्रशिक्षकमा स्वर्ण विजेताले ३ लाख, रजतले २ लाख र कास्यले १ लाख पाउने छन् ।
