काठमाडौं । सरकारले कोरोना संक्रणमबिरुद्वको अभियानमा खेलाडी सहित युवा परिचालन गर्ने भएको छ ।
मन्त्रीपरिषद्को निर्णय अनुसार युवा तथा खेलकुद मन्त्रालयले कोरोना संक्रमणबिरुद्वको अभियानमा राहत वितरण लगायतका काममा युवा, खेलाडी तथा स्काउटलाई स्वंयमसेवकको रुपमा परिचालन गर्ने निर्णय गरेको हो ।
युवा तथा खेलकुद मन्त्री जगतबहादुर विश्वकर्मा सहित मन्त्रालय अन्तर्गतका निकायका प्रमुखको मंगलबार बसेको बैठकले आफ्ना मातहत भएका कामलाई एकिकृत तरिकाले अघि बढाउने निर्णय गरेको छ ।
यस्तै, बैठकले युवा तथा खेलकुद मन्त्रीको संयोजकत्वमा ९ सदस्यीय स्वंयमसेवक व्यवस्थापन तथा परिचालन समिति गठन गरिएको छ ।
समितिले कोरोनाबिरुद्वको अभियानमा राहात वितरण लगायतमा युवा, खेलाडी तथा स्काउटलाई स्वंयमसेवकको रुपमा व्यवस्थापन तथा परिचालन गर्ने, योजना बनाउने र निर्णय कार्यान्वयनका लागि आवश्यक समन्व्य गर्नेछ ।
समितिमा युवा तथा खेलकुद मन्त्री सहित मन्त्रालयका सचिव रामप्रसाद थपलिया, युवा बिज्ञ माधव ढुङ्गेल, राखेप सदस्य सचिव रमेशकुमार सिलवाल, नेपाल स्काउटका संयोजक लोकबहादुर भण्डारी, राष्ट्रिय युवा परिषद्का प्रशासकीय प्रमुख बाबुराम ढुङ्गाना, युवा तथा साना व्यवसायी स्वरोजगार कोषका कार्यकारी निर्देशक विष्णुप्रसाद गौतम र मन्त्रीले तोकेका एक जना बिज्ञ रहनेछन् । समिति सदस्य सचिवमा मन्त्रालयका सहसचिव मानबहादुर बीके रहनेछन् ।
बैठकले स्थानीय तथा प्रदेश सरकारसंग समन्व्य गरिेर स्वंयमसेवक व्यवस्थापन तथा परिचालन गर्नका लागि युवा परिचालनको जिम्मेवारी राष्ट्रिय युवा परिषद्, खेलाडी परिचालनको जिम्मेवारी राखेप, स्काउट परिचालनको जिम्मेवारी नेपाल स्काउटलाई दिने निर्णय गरेको छ ।
यस्तै, युवा, खेलाडी तथा स्काउटका स्वंयमसेवकलाई आवश्यकता अनुसार स्वंयमसेवकीय भूमिकामा आ आफ्नो ठाउँमा परिचालन गर्न सबै स्थानीय तह र प्रदेश सरकारलाई अनुरोध गर्ने निर्णय गरेको छ । यस्तै स्वंयमसेवकलाई सामाजिक दुरी कायम राखेर सावधानीपूर्वक काममा परिचालन हुन बैठकले अनुरोध गरेको छ ।
बैठकले स्वंयमसेवकको रुपमा परिचालन हुने सबैको कामको क्षेत्र समेत निर्धारण गरेको छ ।
अभियानमा स्वंयमसेवकको रुपमा परिचालित हुने खेलाडी तथा युवा स्वंयमसेवीले विदेशबाट फर्किएका र संभावित संक्रमितलाई पहिचान गरि सम्बन्धित निकायलाई जानकारी गराउने, क्वारेन्टाईनमा बस्न प्रेरित गर्ने, क्वारेन्टाईन निर्माणमा सहयोग गर्ने, सम्भावित संक्रमितलाई स्वास्थ्य परिक्षण गराउन सघाउने, विरामीलाई अस्पताल पुर्याउन सहयोग गर्ने, स्वास्थ्य सामाग्री तथा उपकरणको वितरण र व्यवस्थापनमा सम्बन्धित निकायलाई सघाउने, कृषी बाली भित्राउन किशानलाई सहयोग गर्ने लगायतका काम गर्नेछन् ।
