काठमाडौं । अखिल नेपाल फुटबल संघ (एन्फा)ले कोरोना भाईरसको महामारीबिरुद्ध लड्न दुई एम्बुलेन्स प्रयोग गर्न दिने भएको छ ।
एन्फा अध्यक्ष कर्माछिरिङ शेर्पाले ललितपुर महानगरलाई महामारीबिरुद्ध लड्न दुई एम्बुलेन्स हस्तान्तरण गरेका हुन् ।
एन्फा अध्यक्ष शेर्पाले महानगरका मेयर चिरीबाबु महर्जनलाई ललितपुर महानगरको प्राङ्गणमा सो एम्बुलेन्स हस्तान्तरण गरेका छन् ।
अवस्था सामान्य बनेपछि महानगरले सो एम्बुलेन्स एन्फालाई फिर्ता गर्नेछ ।
मेयर महर्जनले संकटको बेलामा एन्फाले गरेको सहयोगका लागि धन्यवाद दिए ।
महानगरले समेत एन्फाकै आग्रहमा आफ्नो क्षेत्र भित्र पर्ने विभिन्न श्रेणीका क्लबलाई बर्षेनी आर्थिक सहयोग उपलब्ध गराउँदै आएको छ ।
विश्व फुटबल महासंघ (फिफा)को सहयोगमा एन्फाले दुई एम्बुलेन्स खरिद गरेको थियो ।
एन्फाले कोरोना महामारीबिरुद्व क्वारेन्टाईनको रुपमा प्रयोग गर्न आफ्नो एकेडेमी दिने यसअघिनै घोषणा गरिसकेको छ ।
प्रदेश २ को रौतहटमा रहेको महिला फुटबल एकेडेमी भने क्वारेन्टाईनको रुपमा प्रयोग भईरहेको छ ।
एन्फाले आवश्यकताका आधारमा बुटवल, धरान र काठमाडौंको फुटबल एकेडेमी समेत क्वारेन्टाईनको रुपमा प्रयोग गर्न आग्रह गर्दै आएको छ ।
विश्व स्वास्थ्य संगठनले कोरोनालाई महामारीको रुपमा घोषणा गरेपछि विश्वभर उच्च सतर्कता अपनाईएको छ ।
नेपालमा समेत लकडाउनको घोषणा गरेर शंकास्पद व्यक्तिको चेक जाँचको प्रक्रियालाई सुरु गरिएको छ ।
नेपालमा अहिलेसम्म ९ जनामा कोरोनाको संक्रमण देखिएको पुष्टि भएको छ । एक जना पूर्ण रुपमा निको भएर घर फर्किएकी छिन् भने अन्य संक्रमितको उपचार भईरहेको छ ।
