एन्फा उपाध्यक्ष नेम्बाङ्गको ९ बुँदे 'नोट अफ डिसेन्ट'

काठमाडौं । अखिल नेपाल फुटबल संघ एन्फाका वरिष्ठ उपाध्यक्ष पंकज बिक्रम नेम्बाङ्गले ९ बुँदे नोट अफ डिसेन्ट दर्ता गराएका छन् ।

एन्फाको माघ २६ गते बसेको कार्यसमिति बैठकको निर्णयमा फरक मत राख्दै नेम्बाङ्गले ९ बुँदे फरक मत राखेका हुन् ।

'एन्फा बैठकको निर्णयमा असहमती राख्दै माईन्यूट बुकमा आफ्नो असहमती लेख्न माग्दा संघको अध्यक्ष र महासचिवबाट लिखित असहमती पत्र लेख्न भनेकोले असहमती पत्र लेखि एन्फा कार्यालयमा दर्ता गराएको छु ।' नेम्बाङ्गले दर्ता गराएको फरक मतमा लेखेका छन् ।

उनले एजेण्डा नम्बर दुईको निर्णयमा फरक मत राख्दै लिगको प्रायोजकको रुपमा कतार एअवरवेज र एनटीभीसंगको सम्झौता कार्यसमितिमा पर्याप्त छलफल र निर्णय नगरि सम्झौता गरेको भन्दै युवा तथा खेलकुद मन्त्रालयको निर्देशन र एन्फा आर्थिक नियमावली विपरित भएको दाबी सहित आफ्नो फरक मत राखेका छन् ।

यस्तै, एजेण्डा ५ को निर्णयमा रौतहटमा एन्फा महिला फुटबल एकेडेमी निर्माण गर्न नेपा टेक प्रालिलाई ठेक्का सदर गर्ने प्रक्रिया  त्रुटिपूर्ण रहेको भन्दै नेम्बाङ्गले फरक मतमा राखेका छन् ।

उनले एजेण्डा १८ मा युईएफएको सहयोगबारे छलफल नगरि कार्यसमितिबाट अनुमोदन गरिएको भन्दै कार्यन्वयन पहिल्यै गर्ने र पछि कार्यसमितिबाट अनुमोदन गर्ने परिपाटी राम्रो नहुने बताएका छन् ।

यस्तै, एजेण्डा २१ मा क्लब लाईसेन्सिङको सम्बन्धमा एएफसीले एन्फालाई गरिएको जरिवानाको बिषयमा कारण र कमजोरी पत्ता लगाउन निष्पक्ष छानविन हुनुपर्ने मत उनको छ ।

एजेण्डा २७ मा भक्तपुर जिल्ला फुटबल संघल खेल गतिविधि गरिरहेको अवस्थामा कार्यक्रम र बजेट रोक्नु नेपाली फुटबलको हितमा नहुने फरक मत नेम्बाङ्गले राखेका छन् ।

यस्तै, एजेण्डा ३१ मा विविधको 'ङ' अन्तर्गत मनोमानी ढङ्लगे स्वास्थ्य उपचार खर्च उपलब्ध गराउने निर्णय गरिएको भन्दै मापदण्ड नबनाएर उपचार खर्च दिने परम्परा संघको विधान र आर्थिक कार्यविधी विपरित रहेको नेम्बाङको मत छ ।

नेम्बाङ्गले विविध अन्तर्गत पदपूर्ति समितिको सिफारिसको दुई नम्बरमा रहेका व्यक्तिलाई संघको 'फाईनान्स हेड' र पदपूर्ति समितिलाई थाहा नदिएर कर्मचारी नियुक्त गरिएको भन्दै असहमती जनाएका छन् ।

उनले आर्थिक नियमावली अनुसार प्रक्रिया पुर्याएर खरिद कार्य अघि बढाउनुपर्ने भन्दै आफैले बनाएको नियमावलीको कार्यान्वयन नगरिएको बिषय नोट अफ डिसेन्टमा लेखेका छन् ।

'चेन्ज एन्फा'को नारा सहित एन्फामा आएका नेम्बाङ्गले अध्यक्ष कर्माछिरिङ शेर्पा नेतृत्वको कार्यसमितिले गरेको निर्णयबिरुद्ध पहिलो पटक फरक राखेका हुन् ।

उनले पछिल्लो समय एन्फा नेतृत्वसंग फरक मत राख्दै आएका थिए । तर औपचारिक रुपमा फरक मत राख्दै उनले एन्फा नेतृत्वबिरुद्व उभिएको संकेत गरेका छन् ।