मोहन बगानलाई आईलिगको उपाधि

एजेन्सी । मोहन बगानले भारतको शीर्ष डिभिजन लिग हिरो आई लिग फुटबलको उपाधि जितेको छ ।

कल्याणी रंगशालामा मंगलबार राति भएको खेलमा एजवाल एफसीलाई १-० गोल अन्तरले पराजित गर्दै मोहन बगानले उपाधि जितेको हो ।

मोहन बगानको जितमा स्पेनिस खेलाडी पापा बाबाकर डियवारले ८० औं मिनेटमा निर्णायक गोल गरे ।

भारतीय फुटबलमा लामो इतिहास बोकेको मोहन बगानले दोस्रो पटक लिगको उपाधि जितेको हो ।

यस जितसँगै मोहन बगानले १६ खेलमै उपाधि जित्न सफल भयो । १६ खेलमा १ खेल मात्रै हार ब्यहोरेको मोहन बगानले ३५ अंक प्राप्त गर्याे । पाँच खेल बाकी रहँदा बगान दोस्रो स्थानमा रहेको क्वेस एष्ट बगानभन्दा १६ अंकले अगाडि रहेको छ ।

समान २३ अंक रहेपनि क्वेस एष्ट बगान र पंजाब एफसी दोस्रो स्थान र तेस्रो स्थानमा रहेका छन् । बगान च्याम्पियन बनेसँगै नेपाली राष्ट्रिय टिमका कप्तान किरण कुमार लिम्बु सम्मिलित पंजाबले दोस्रो स्थानको लागि प्रतिस्पर्धा गर्ने भएको छ ।

यस अघि मोहन बगानले सन् २०१४–१५ मा पहिलो पटक आई लिग जितेको थियो । आई लिगको ११ औं संस्करण आईपुग्दा मोहन बंगान दुई पटक उपविजेता बनेको छ ।

पाँच खेल अगाडी नै उपाधि हात पारेको बगानले हिरो आईलिगमा सबै भन्दा छिटो लिग जित्ने ईतिहास पनि रचेको छ । यस अघि आई लिगको पहिलो संस्करणमा डेम्पो स्पोर्टिङ क्लबले ४ खेल अघि लिग जितेर ईतिहास बनाएको थियो ।