काठमाडौं । आयोजक ललितपुर महानगरपालिका र गोदावरी नगरपालिकाले महानगर कप महिला तथा पुरुष भलिबल प्रतियोगितामा विजयी सुरुवात गरेको छ ।
जवालाखेलस्थित जवालाखेल भलिबल प्रशिक्षण केन्द्रमा शनिबार भएको पुरुषतर्फको पहिलो खेलमा ललितपुरले भक्तपुर नगरपालिकालाई ३-१ को सेटमा पराजित गर्यो ।
सुखद सुरुवात गर्ने क्रममा ललितपुरले भक्तपुरलाई ३२-३०, २५-२७, २५-१६ र २५-२१ को सेटमा जित निकाल्यो ।
पुरुषतर्फ नै गोदावरीले धुलिखेल नगरपालिकालाई ३-० को सेटमा हरायो । गोदावरीले धुलिखेललाई २५-१२,२५-२२ र २५-२३ ले हरायो ।
पुरुषको तेस्रो खेलमा कागेश्वरी मनोहरा नगरपालिकाले किर्तिपुर नगरपालिकालाई २५-१०,२५-१० र २५-६ को सेटमा पराजित गर्यो ।
महिलातर्फको पहिलो खेलमा बनेपा नगरपालिकाले गुप्तेश्वर नगरपालिकाबाट वाक ओभर पाएको छ ।
महिलातर्फकै ललितपुर महानगरपालिका र चन्द्रागिरी नगरपालिकाबीचको खेल भने वर्षाको कारण स्थगित भएको छ । उक्त खेल मंगलबार हुनेछ ।
ललितपुर महानगरपालिकाले आयोजना गरेको प्रतियोगितामा पुरुषमा १३ र महिलामा ८ टिमको सहभागिता रहेको छ ।
ललितपुर महानगरपालिकाको १ सय १ औं स्थापना दिवसको अवसरमा जारी प्रतियोगिताको महिला र पुरुष दुवैको विजेताले २ लाख, उपविजेताले १ लाख र तेस्रोले ५० हजार पाउने छन् । यस्तै चौंथोले २५ हजार पाउने छ । सेमिफाइनलमा पुग्ने टिमले १५/१५ हजार पाउने छन् ।
यस्तै महिला र पुरुष दुवैको सर्वोकृष्ट खेलाडीले १० हजार पाउँदा व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले जनही ५/५ हजार पाउने छन् ।
