काठमाडौं । १३ औं संस्करणको काठमाडौं म्याराथन शनिबार आयोजना हुने भएको छ ।
आयोजक प्रो स्पोर्टस प्रालिले बिहिबार पत्रकार सम्मेलन गर्दै प्रतियोगिता पुस ५ गते (शनिबार) आयोजना हुने जानकारी गराएको छ ।
त्रिपुरेश्वरस्थित दशरथ रंगशाला आयोजना हुने काठमाडौं म्याराथनमा विभिन्न ७ स्पर्धामा प्रतिस्पर्धा हुनेछ । प्रतियोगिताको मुख्य स्पर्धा भने महिला/पुरुषको फुल म्याराथन र हाफ म्याराथन रहने छ ।
म्याराथन त्रिपुरेश्वरबाट सुरु भएर थापाथली हुँदै कुपण्भडोल, पाटन गेट, चकुपट, युएन पार्क, शंखमुल, बानेश्वर, तीनकुने हुँदै कोटेश्वर चोक घुमेर एयरपोर्ट, गौशाला, पशुपत, रातोपुल, नक्साल, भाटभटेनी, बालुवाटार, लैनचौर, नारायणहिटी, दरबारमार्ग, घन्टाघर, भद्रकाली र सहिदगेट हुँदै त्रिपुरेश्वर रंगशालामा पुगेर सकिने छ ।
यस्तै हाफ म्याराथन त्रिपुरेश्वरबाट सुरु भएर थापाथली, माइतीघर, सिंहदरबारको दक्षिणी गेट, हनुमानथान, अनामनगर, प्रदर्शनीमार्ग, भद्रकाली, सहिदगेट हुँदै रंगशालामा आएर सकिनेछ ।
।
त्यस्तै ५ किमिको खुल्ला दौड, कर्पोरेट रिले, ५ किमीकै छात्रा/छात्र दौड र ३ किमीको ह्वीलचेयर दौड हुनेछ । यस्तै यस पटक फेमीली दौड समेत राखिएको छ ।
म्याराथनतर्फ महिला र पुरुष दुवै स्पर्धाका विजेताले ५० हजार, दोस्रोले २० हजार र तेस्रोले १५ हजार पाउने छन् । हाफ म्याराथनतर्फ महिला पुरुष दुवैको विजेताले २० हजार, दोस्रोले १३ हजार र तेस्रोले ७ हजार पाउने छन् ।
५ किमिको खुल्ला दौडको विजेताले १० हजार, दोस्रोले ६ हजार र तेस्रोलाई ४ हजार पाउने छन् ।
कर्पोरेट रिलेको विजेताले २० हजार, दोस्रोले १० र तेस्रो ५ हजार प्राप्त गर्दा गर्दा ५ किमीकै छात्रा/छात्र दौड र ३ किमीको ह्वीलचेयर दौडको विजेताले ५ हजार, दोस्रोले ३ र तेस्रोले २ हजार पाउने छन् । यस्तै फेमीली दौडको विजेतालाई १० हजार, दोस्रोलाई ५ र तेस्रोलाई ३ हजार प्रदान गरिने छ ।
आयोजकले प्रतियोगितालाई प्रदेश नम्बर ३ सरकारले अपनत्व गरेको जनाएको छ ।
आयोजक प्रो स्पोर्टसका अध्यक्ष निलेन्द्रराज श्रेष्ठले प्रदेश सरकारले अपनत्व लिनु प्रतियोगिताको लागि नयाँ आयाम थपिएको बताए ।
'प्रदेश सरकारले अपनत्व लिनु र सरकारले समर्थन गर्नु भनेको हाम्रो सफलता हो । नयाँ आयाम हो,' श्रेष्ठले भने, 'स्थानिय सरकार आउदा खुसी छौँ ।'
यस्तै प्रदेश ३ का पर्यटनमन्त्री अरुण प्रसाद नेपालले प्रतियोगितालाई काठमाडौं बाहिर पनि लैजानु पर्ने सुझाब दिदै प्रतियोगिताले सरकारले घोषणा गरेको भिजिट नेपाललाई सहयोग पुग्ने बताए ।
