पोखरा । १३ औं दक्षिण एशियाली खेलकुद (साग) अन्तर्गत आर्चरीमा नेपालले एक रजत सहित तीन पदक प्राप्त गरेको छ ।
नेपालले आइतबार कम्पाउण्ड (५० मिटर) मिक्सतर्फ रजत पदक प्राप्त गरेको हो । फाइनलमा खेलमा बंगलादेशले नेपाललाई ८ अंकको अन्तरले पराजित गर्दा नेपाल रजत पदकमा सिमित भएको हो ।
नेपालले फाइनल खेलमा १ सय ४० अंक ल्याउदा बंगलादेशले भने १ सय ४८ अंक ल्याउन सफल भएको हो । नेपाली टिममा इमायुङग राई र शान्तह मल्ल रहेका थिए भने बंगलादेशका सुस्मिता बनिक र एमडी सोहिल राना सहभागि भएका थिए । उक्त इभेण्टमा श्रीलंकाले कास्य पदक हात पार्न सफल भएको छ ।
आइतबार ६ वटा स्वर्ण पदकको छिनोफानो हुँदा ६ वटामै बंगलादेशले स्वर्ण जितेको छ ।
बंगलादेशले कम्पाउण्ड महिला तथा पुरुष, रिकर्भ महिला तथा पुरुष र रिकर्भ मिक्सतर्फ स्वर्ण पदक हात पार्न सफल भएको हो ।
त्यस्तै कम्पाउण्ड पुरुषतर्फ नेपालले कास्य पदक हात पार्न सफल भएको छ । नेपालले कास्य पदकको लागि आइतबार भएको खेलमा श्रीलंकासंगलाई १ अंकको अन्तरले पराजित गर्दै कास्य पदक हात पार्न सफल भएको हो । नेपालले २ सय ८ अंक ल्याएको थियो भने श्रीलंकाले २ सय ७ अंक ल्याएको थियो । नेपालको टिममा मिन प्रसाद गौचन, सन्त मल्ल र योगेन्द्र शेरचन रहेका थिए ।
उक्त बिधाको स्वर्ण पदकको लागि बंगलादेशले भुटानलाई पराजित गर्दै स्वर्ण पदक जितेको हो । विजेताले २ सय २५ अंक ल्याउदा उपविजेताले भने २ सय १४ अंक ल्याएको थियो । बंगलादेशको टिममा असिकुज्जमान महमद, दास असिम कुमार र राना एमडी सोहेल रहेका थिए भने भुटानको टिममा वाङग्डि फुन्टशो, दोर्जी ताण्डिङ र सेराव कर्मा रहेका थिए ।
कम्पाउण्ड महिला तर्फको खेलमा नेपालले सिधै वाई पाएर कास्य पदक प्राप्त गर्न सफल भएको हो । यस इभेण्टमा भुटान सहभागी नभएसंगै नेपाललाई सहज कास्य पदक प्राप्त भएको हो ।
नेपालको टिममा मोनिका राना मगर, मन्जु बजगाई र इमायुङ राई रहेका थिए । उक्त बिधामा बंगलादेशले श्रीलंकालाई पराजित गर्दै स्वर्ण जितेको हो । बंगलादेशको टिममा वानिक सुस्मिता, विश्वास सुमा र रे समोलि रहेका थिए भने श्रीलंकाको टिममा करुनारन्ते अनुराधा, सालिका हर्सानि र थाक्सिला दमयान्थि रहेका थिए।
त्यसै गरी कास्य पदकको लागि नेपाल रिकर्भ पुरुष तर्फको इभेण्टमा भुटानसंग समान अंक भए पनि नेरेस्ट द प्वाइटका आधारमा नेपाल पराजित भएको छ । नेपाल र भुटानको समान २८ अंक रहेको थियो । नेपाली टिममा तिकल पुन मगर, रोसन नगरकोटी र अशिम शेरचन रहेकाछन्। उक्त बिधामा बंगलादेशले श्रीलंकालाई पराजित गरी स्वर्ण हात पार्न सफल भएको हो ।
रिकर्भ महिला तर्फको खेलमा पनि नेपालले कास्य पदकको लागि भुटानसंग भएको खेलमा २ अंकले पराजित भयो । नेपालको टिममा ज्ञानु अवाले, मित्र राई र आयुसा तामाङ रहेका थिए भने भुटानको टिममा ओलम्पिकमा छनौट भएकी खेलाडी कर्मा, डेकि सुनाम र डेमा सोनाम रहेका थिए । उक्त बिधामा पनि बंगलादेशले श्रीलंकालाई पराजित गर्दै स्वर्ण हात पारेको हो । बंगलादेशको टिममा खातुन एमएसटी इटिवाई, मोनेरा महनाज अक्तेर र व्यूटि रहेका थिए भने श्रीलंकाको टिममा शिल्भा थिसारी मधुसिका, तयावल्लि रिहाना र वाक दुगे मल्सा दिल्हानी रहेका थिए ।
रिकर्भ मिक्स टिम पनि नेपालले कास्य पदक प्राप्त गर्न चुक्यो । कास्य पदकको लागि आज भएको खेलमा श्रीलंकाले नेपाललाई पराजित गरेको हो । नेपाली टिममा आइषा तामाङ, रोशन नगरकोटी श्रीलंकाको तर्फबाट डे सिल्भा महमदाच्चि सजिव र तयावल्लि रिहाना रहेका थिए । उक्त बिधा पनि बंगलादेशले भुटानले पराजित गर्दै स्वर्ण पदक हात पार्न सफल भएको हो । बंगलादेशको टिममा खातुन एमएस्टी इटीवाई र साना एमडी रुमन सहभागि भएका थिए भने भुटानको टिममा देमासोनाम र छिरिङ किन्ले रहेका थिए ।
