काठमाडौं । पाँचौ संस्करणको नेपालगन्ज म्याराथनको मुख्य प्रायोजकको रुपमा धारा शुद्ध तोरीको तेल जोडिएको छ ।
आयोजक क्रिएटिभ ह्याण्ड्सले आइतबार धारा शुद्ध तोरीको तेल उत्पादक कम्पनि केएल दुगड ग्रुप अन्तर्गत सौरभ आयल मिलसँग मुख्य प्रयोजन सम्झौतामा हस्ताक्षर गरेको छ ।
क्रिएटिभ ह्याण्ड्सका अध्यक्ष टीएस ठकुरी र केएल दुगडका महाप्रबन्धक प्रदीप कुमार छाजेडले सम्झौता पत्रमा हस्ताक्षर गरे । सम्झौता रकम भने खुलाईएको छैन ।
सम्झौता सँगै प्रतियोगिताको नाम धारा नेपालगन्ज म्याराथन रहनेछ ।
पाँचौ संस्करणको प्रतियोगिता मंसिर ७ गते हुनेछ ।
यस संस्करणमा पुरुष खुल्लातर्फ म्याराथन, महिलाको हाफ म्याराथन, ५ किलोमिटर महिला तथा पुरुषको स्कुल स्तरीय तथा खुल्ला दौड समावेश गरिएको आयोजकले जनाएको छ ।
त्यसैगरी ८ देखि १२ बर्ष उमेर समूह, शारीरिक रुपले अशक्तका लागि पनि दौड स्पर्धा र ३ किलोमिटरको कर्पोरेट दौड पनि राखिएको छ ।
सरकार र सशस्त्र द्वन्द्वरत तत्कालिन माओवादीबीच मंसीर ५ गते भएको बिस्तृत शान्ति सम्झौताको स्मरण गर्दै क्रिएटिभ ह्याण्ड्सले हरेक वर्ष नेपालगञ्ज म्याराथन आयोजना गर्दै आएको छ ।
