काठमाडौं म्याराथन पुस पहिलो साता

काठमाडौं । १३ औं संस्करणको काठमाडौं म्याराथन आगामी पुसको पहिलो साता आयोजना हुने भएको छ ।

आयोजक प्रो स्पोर्टस प्रालिले मंगलबार पत्रकार सम्मेलन गर्दै प्रतियोगिता पुस ५ गते आयोजना हुने जानकारी गराएको छ । 

त्रिपुरेश्वरस्थित दशरथ रंगशाला आयोजना हुने म्याराथनमा विभिन्न ७ स्पर्धामा प्रतिस्पर्धा हुने प्रो स्पोर्टसका अध्यक्ष निलेन्द्रराज श्रेष्ठले जानकारी गराए ।

काठमाडौं म्याराथनको मुख्य स्पर्धा महिला/पुरुष फुल म्याराथन र हाफ म्याराथन रहने छ । म्याराथन त्रिपुरेश्वरबाट सुरु भएर माईतिघर, बानेश्वर हुदै भक्तपुर सल्लाघारी हुँदै पुन: त्रिपुरेश्वर आएर सकिने छ ।

त्यस्तै ५ किमिको खुल्ला दौड,  कर्पोरेट रिले, ५ किमीकै छात्रा/छात्र दौड र ३ किमीको ह्वीलचेयर दौड हुनेछ । यस्तै यस पटक फेमीली दौड समेत राखिएको छ । 

यसअघि आयोजकले यस प्रतियोगिता असोजमा गर्दै आएको थियो । तर, नेपालमा आयोजना हुने १३ औं दक्षिण एसियाली खेलकुदलाई मध्ये नजर गर्दै  पुसमा सारिएको आयोजकले जनाएको छ ।

डिसेम्बरमा गर्ने भनिएपनि साग गेम्सको कारण प्रतियोगिता सारिएको हो । असोजमा गर्दा मौसम राम्रो हुने भए पनि पर्यटन वर्षलाई सफल पार्न समय सारिएको हो,' पत्रकार सम्मेलनमा अध्यक्ष श्रेष्ठले भने, 'सरकारसँग सहकार्य गरेर प्रतियोगिता गर्ने छौं । आम मानिससँग स्पोर्ट्सलाई नजिक बनाउन आयोजना गर्न लागेका हौं ।'

यस्तै अध्यक्ष श्रेष्ठले म्याराथनका लागि काठमाडौं र भक्तपुर नगरपालिकासँग छलफल भईरहेको समेत बताए ।

विजेताले पाउने पुरस्कार रकम भने पछि खुलाईने आयोजकले जनाएको छ । गत वर्ष म्याराथनतर्फ महिला र पुरुष दुवै स्पर्धाका विजेताले १ लाख, दोस्रोले ५० हजार र तेस्रोले २५ हजार पाएका थिए । हाफ म्याराथनतर्फको विजेताले ५० हजार, उपविजेताले २५ हजार र तेस्रोले १० हजार पाएका थिए ।

त्यस्तै राष्ट्रिय कीर्तिमान बनाउने नेपाली खेलाडीलाई पनि पुरस्कृत गरिने छ । राष्ट्रिय कीर्तिमान बनाउने खेलाडीले २ लाख पाउने आयोजकले जनाएको छ ।

कीर्तिमान बनाउने खेलाडीको लागि पूर्व ओलम्पियन रघु राज वन्तले प्रायोजन गर्ने छन् । पत्रकार सम्मेलनमा वन्तले कीर्तिमान बनाउने खेलाडीलाई २ नगद दिने घोषणा गरेका हुन्  । पुरुषको म्याराथनमा बैकुण्ठ मानन्धरको नाममा २ घण्टा १५ मिनेट १ सेकेण्डको कीर्तिमान रहेकोछ  ।

प्रतियोगिताको लागि आयोजकले एयर्लाइन्स पार्टनरका लागि ड्रागन एयरसँग सम्झौता गरेको छ ।  प्रो स्पोर्ट्सका डिरेक्टर भवति राई र ड्रागनका नेपाल प्रमुख जानु मलेकुले सम्झौता पत्रमा हस्ताक्षर गरे ।