म्याराथनमा राजपुराको प्रदर्शनमा सुधार

काठमाडौं । नेपाली धाविका राजपुरा पछाईले जापानमा भएको हाकाईदो म्याराथनमा आफ्नो प्रदर्शनमा सुधार गरेकी छिन् ।

आइतबार भएको महिलातर्फको म्याराथनमा राजपुराले निर्धारित दुरी २ घण्टा ५६ मिनेटमा पुरा गरिन् । उनको यो प्रदर्शनमा सुधार हो । राजपुराले आठौं राष्ट्रिय खेलकुदमा २ घण्टा ५९ मिनेट ३८ सेकेण्डको समय निकालेर स्वर्ण जितेकी थिइन् । समग्रमा उनी १८ औं स्थानमा रहिन् ।

नेपालका अर्का खेलाडी होमलाल श्रेष्ठले भने आफ्नो प्रदर्शनमा सुधार गर्न सकेनन् । होमले निर्धारित दुरी २ घण्टा ३२ मिनेट ३६ सेकेण्डको समय निकाले । समग्रमा होम ६१ औं स्थान रहे ।