काठमाडौं । नेपालका मोहम्मद उमर खान र धनमाया सिन्जालीले दक्षिण कोरियामा भएको १२ औं विश्व तेक्वान्दो कल्चरल एक्सो तथा च्याम्पियनसिपमा स्वर्ण पदक जितेका छन् ।
उमरले फाइटिङको ४८ केजी तौलसमूहमा स्वर्ण हात पारेका हुन् । पुम्सेमा भने उनले कास्य पदक हात पारे । धनमायाले महिला फाइटकै ६३ केजीमुनि तौलसमूहमा स्वर्ण जित्न सफल भएकी थिइन् ।
यस्तै नेपालका लागि सहवीर जंग रावल, उज्वल श्रेष्ठ र रेखमाया गुरुङले फाइटमा थप स्वर्ण जिते। सहवीरले ४० केजी तौलमा स्वर्ण जित्दा पुम्सेमा रजत पदकमै चित्त झुाए । उज्वलले पनि ६८ केजी तौलसमूहमा स्वर्ण जित्दा पुम्सेमा कांस्य पदकमै सीमित भए । रेखमायाले ६७ केजी स्वर्ण जित्दा पुम्सेतर्फ रजत हात पारिन् ।
पुरुष फाइटिङको ६३ केजी तौलसमूहमा फाइनलमा पुगेका दिपेन्द्र बहादुर नेपालीले उत्कृष्ट प्रतिस्पर्धा गरे पनि चोट बोकेपछि रजत पदकमै चित्त बुझाउन बाध्य भए । दीपेन्द्रले पुम्सेतर्फ भने कांस्य पदक जितेका थिए ।
यस्तै फाइटतर्फ पुरुष ४५ केजीमा सागर बराल र ४८ केजीमा रोनिस पौडेलले नेपालका लागि रजत पदक जित्नै सफल भए । दुवैले पुम्सेतर्फ कांस्य जितेका थिए । पुरुष फाइटिङकै ५४ केजीमा कांस्य जितेका अब्बास खानलदे पुम्सेमा पनि कांस्य पदकमै सीमित भए । जिप्सन नेपालले फाइटिङको ४० केजीमा र पुम्सेमा १–१ जित्न सफल भए । महिलाको ५३ केजी तौलसमूहको फाइटिङमा मेलिना गुरुङले कांस्य पदक जितिन् ।
कोरियाको मुजु सहरमा जारी प्रतियोगितामा नेपाली टोलीले ५ स्वर्ण, ५ रजत र १० कांस्य गरी कुल २० पदक जित्न सफल भएको छ ।
यस्तै च्याम्पियनसिपको दौरान आयोजकले नेपालका हेड अफ टिम खानलाई नगद १ लाख र प्रसंशापत्रबाट सम्मान गरेको छ ।
अब नेपाली टोली च्याम्पियनसिप पश्चात थाइल्यान्डको बैंककमा आगामी २२ जुलाईमा हुने अन्तर्राष्ट्रिय तेक्वान्दो सेमिनारमा सहभागी हुन त्यसतर्फ प्रस्थान गर्नेछन् ।
