एजेन्सी । कुनै समय ठुला राष्ट्रका उत्कृष्ट खेलाडी र एसोसियट राष्ट्रका खेलाडीबीचको भिडन्त नै विश्वकप क्रिकेटको सुन्दरता थियो । तर, १२ औं संस्करणको विश्वकपमा १० राष्ट्रको सहभागिताले विश्वकप खल्लो महसुस भईरहेको छ ।
विगतको विश्वकपमा एसोसियट राष्ट्रले उपाधि दाबेदार टोलीलाई निकै हम्मेहम्मे पार्थे । केहि विश्वकपमा एसोसियट राष्ट्रले टेष्ट राष्ट्रलाई पराजित गरेको इतिहास छ । एसोसियट टोलीले प्रतियोगितामा फरक परिस्थिति सिर्जना गर्थे । जसको कारण विश्वकपको रोमान्चकता छुट्टै हुने गर्थ्यो ।
सन् १९९६ केन्याले वेष्ट इण्डिजलाई पराजित गर्दा वा आयरल्याण्डले जिम्बाबे र पाकिस्तानलाई सन् २००७ मा हराउँदा क्रिकेट पण्डितहरु आश्चर्यचकित परेका थिए ।
अझ सन् २००३ को विश्वकपमा केन्याले सेमिफाइनलको यात्रा तय गर्दा सारा विश्वनै चकित भएको थियो । हालसम्म एसोसियट राष्ट्रले विश्वकपमा निकालेको यो नै सर्वाधिक राम्रो नतिजा हो ।
इंग्ल्याण्डमा जारी विश्वकपमा भने कुनै पनि एसोसियट राष्ट्रको सहभागिता रहेको छैन । टेष्ट मान्यता पाएपनि यसपटक आयरल्याण्ड र जिम्बाबेले विश्वकप गुमाएका छन् ।
तर, अघिल्ला विश्वकपमा एसोसियट राष्ट्रले गरेको उच्च प्रदर्शन क्रिकेट प्रेमीहरुले बिर्सने छैनन् । यस पटक एसोसियट राष्ट्रले विश्वकप नखेलेपनी अघिल्ला विश्वकपमा एसोसियट राष्ट्रका खेलाडीले गरेको उच्च प्रदर्शनको चर्चा गरेका छौं ।
१. केभिन ओब्राइन (आयरल्याण्ड)
![Image result for kevin o'brien](http://cdn.shopify.com/s/files/1/0603/6669/files/Kevin_O_brien_Pic_large.jpg?18091993440365064338)
टेष्ट राष्ट्रको मान्यता पाउनु अघि, सन् २०११ को विश्वकपमा आयरल्याण्डका केभिन ओब्राइनले सबैको मन जितेका थिए । आयरल्याण्ड क्रिकेटलाई यो स्थानसम्म पुर्याउनुमा उनको समेत ठुलो यागदान रहेको छ ।
भारतमा भएको सो विश्वकपमा आयरल्याण्डले इंग्ल्याण्डविरुद्ध रोमाञ्चक जित निकाल्दा विश्व चकित बनेको थियो । एम चिन्नास्वामी स्टेडियममा, केभिनको एकल प्रयासले आयरल्याण्ड विश्वकपको क्वाटरफाइनल पुगेको थियो ।
कसले नसोचेको नतिजा निकाल्ने क्रममा केभिनले विश्वकप इतिहासकै छिटो शतक प्रहार गरेका थिए । केभिनले मात्र ६३ बलमा १ सय १३ रन बनाउँदै इंग्ल्याण्डविरुद्ध रोमाञ्चक जित दिलाएका थिए ।
२. ड्वाने लेभेरक (बर्मुडा)
![Image result for dwayne leverock](https://cricket.yahoo.net/static-assets/waf-images/51/7e/dc/0/ba158580badf6e6a0a98e4bba19993b5.jpeg?w=800)
सुन्दा अचम्म लाग्न सक्छ, कुनै समय विश्वकपमा तहल्का मच्याउन सफल राष्ट्र अहिले डिभिजन-४ मा रहेको छ । बर्मुडाले सन् २००७ मा पहिलो पटक विश्वकपमा छनोट हुँदै इतिहाँस बनाएको थियो ।
वेष्ट इण्डिजमा भएको प्रतियोगितामा बर्मुडाले समर्थकको पनि राम्रो साथ पाएको थियो ।
पहिलो खेलमा श्रीलंकासंग पराजित भएको बर्मुडाले दोस्रो खेलमा भारतविरुद्ध मैदान उत्रिएको थियो । पहिले बलिङ गरेको बर्मुडाले पहिलो ओभरमा मात्र ३ रन खर्चियो । दोस्रो ओभर बलिङ गर्न आएका १७ बर्षे मलाची जोन्सले पहिलो बलमा भारतका ओपनर रबिन उथप्पालाई पेभिलियन फर्काउँदै आफ्नो विश्वकप सपना पुरा गरे ।
उक्त खेलमा सबैभन्दा उत्कृष्ट क्षण के रह्यो भने रबिनलाई आउट पार्न ड्वाने लेभेरकले स्लिप क्षेत्रमा लिएको क्याच । उक्त क्याच अहिलेसम्मको उत्कृष्ट क्याच पर्छ । निकै मोटो खेलाडी लेभेरकले दाँयातर्फ डाइभ लगाउँदै एक हातले गरेको क्याच निकै सुन्दर थियो । त्यस क्याचपछि बर्मुडाका खेलाडीले मैदानमा मानेको खुसी बर्मुडाले उपाधि जितेको सरह थियो ।
लेभेरक बाँया हाते अर्थोडक्स स्पिनर हुन् । उनले बर्मुडाका लागि ११ एकदिवसीय खेल खेलेका छन् । अभ्यास खेलमा पौल कलिङवुड र केभिन पिटरसन्को विकेट हात पारेका उनी भारतविरुद्धको क्याच पछि सबै पत्रिकाको हेडलाइन बनेका थिए ।
३. सुल्तान जरावानी (युएई)
![Image result for sultan zarawani](https://www.thenational.ae/image/policy:1.481448:1499673055/image/jpeg.jpg?f=16x9&w=1200&$p$f$w=dfa40e8)
युएईले सन् १९९६ मा विश्वकपमा डेब्यु गरेको थियो । युएईका कप्तान सुल्तान जरावानी यस्ता खेलाडी थिए जो डर बिहिन क्रिकेट खेल्ने गर्थे ।
दक्षिण अफ्रिकाविरुद्धको खेलमा सुल्तानले त्यसको उदाहरण प्रस्तुत गरे । हेल्मेट बिना मैदानमा रहेका सुल्तानले दक्षिण अफ्रिका फास्ट बलर एलन डोनाल्डको सामान गर्दै थिए ।
अचानक डोनाल्डले बाउन्सर फाल्दा सुल्तानको टाउकोमा लाग्यो । सुल्तानले टाउको समात्दै पिच बाहिर निस्कन थाले । सबै खेलाडीहरु सुल्तानलाई सम्हाल्न पिचतर्फ आइरहेका थिए । लाग्दै थियो उनको टाउकोमा नराम्रो चोट लागेको छ । तर, सबै खेलाडीले उनलाई छुन नपाउँदै उनले पिचमा फर्केर ठिक रहेको संकेत गरे ।
जसको कारण ९० को दशकका क्रिकेट समर्थकले उनलाई डरबिहिन खेलाडीको रुपमा आफ्नो मानसपटलमा राखेका छन् । उनले भारतविरुद्ध भएको खेलमा क्रिकेटका हस्ती सचिन तेन्दुलकरलाई समेत आउट गरेका थिए ।
र, यो पनि : विश्वकपमा एसोसियट राष्ट्रको सहभागिता किन आवश्यक ?