तेस्रो स्थानका लागि फ्रान्स-इङ्ल्यान्ड भिड्दै

काठमाडौं । फिफा विश्वकपमा अब दुई खेल मात्र बाँकी छन्। आइतबार हुने उपाधि भिडन्तअघि फ्रान्स र इङ्ल्यान्ड तेस्रो स्थानका लागि आमने सामने हुँदैछन्।

विश्व फुटबलको ध्यान भने अर्जेन्टिना र स्पेनबीच हुने फाइनलतर्फ पनि केन्द्रित भएको छ, जहाँ लियोनल मेस्सी र लामिन यामालबीच पुस्तान्तरणको रोचक भिडन्त देखिनेछ।

विश्वकप इतिहासमा फ्रान्स र इङ्ल्यान्ड तीन पटक आमनेसामने भएका छन्। सन् १९६६ को समूह चरणमा इङ्ल्यान्डले फ्रान्सलाई २-० ले पराजित गरेको थियो भने सन् १९८२ को पहिलो समूह चरणमा ३-१ को जित निकालेको थियो। यी दुई टोलीबीचको पछिल्लो भेट सन् २०२२ को कतार विश्वकपको क्वार्टरफाइनलमा भएको थियो, जहाँ फ्रान्स २-१ ले विजयी भएको थियो।

ओप्टाको सुपरकम्प्युटरले तेस्रो स्थानको खेलमा फ्रान्सलाई जितको प्रमुख दाबेदार मानेको छ। खेलअघि गरिएको २५ हजार सिमुलेसनमध्ये फ्रान्सले निर्धारित ९० मिनेटभित्र जित्ने सम्भावना ५० दशमलव ७ प्रतिशत देखाइएको छ। इङ्ल्यान्डको जितको सम्भावना २५ दशमलव ६ प्रतिशत रहेको छ भने २३ दशमलव ७ प्रतिशत सिमुलेसनमा खेल निर्धारित समयसम्म बराबरीमा सकिएको छ।

स्पेन र अर्जेन्टिनाबीचको फाइनल आइतबार, जुलाई १९ मा इस्ट रदरफोर्डस्थित न्यूयोर्क-न्युजर्सी स्टेडियममा हुनेछ। खेल नेपाली समयअनुसार सोमबार बिहान पौने १ बजे बजे सुरु हुनेछ।

स्पेन दोस्रोपटक विश्वकपको उपाधि जित्ने लक्ष्यमा छ भने साविक विजेता अर्जेन्टिना चौथो विश्वकप उपाधिको खोजीमा हुनेछ। यी दुई टोलीबीचको पछिल्लो भेट सन् २०१८ मा मड्रिडमा भएको मैत्रीपूर्ण खेलमा भएको थियो, जहाँ स्पेनले अर्जेन्टिनालाई ६–१ ले पराजित गरेको थियो।

अमेरिकी राष्ट्रपति डोनाल्ड ट्रम्पले फाइनल खेल अवलोकन गर्ने र विजेता टोलीलाई विश्वकप ट्रफी प्रदान गर्ने अपेक्षा गरिएको छ।

यसपटक विश्वकप विजेता टोलीले ट्रफी र स्वर्ण पदकसँगै नयाँ पुरस्कार पनि प्राप्त गर्नेछ। फिफाले पहिलोपटक उत्तर अमेरिकी खेलकुद परम्पराबाट प्रेरित ‘च्याम्पियनसिप रिङ’ प्रदान गर्न लागेको हो। विजेता टोलीका लागि ३० वटा विशेष औँठी निर्माण गरिनेछ भने समर्थकका लागि थप १ हजार ९ सय ९६ वटा कलेक्टर्स एडिसन बिक्री गरिनेछ।

विजेता टोलीको पहिचानअनुसार औँठीलाई विशेष रूपमा डिजाइन गरिनेछ। औँठीको एक भागमा विश्वकप ट्रफी र अर्को भागमा विजेता टोलीसँग सम्बन्धित विवरण राखिनेछ। खेलाडीको औँलाको आकारअनुसार तयार गरेर ती औँठी पछि विशेष समारोहमा प्रदान गरिनेछ।