कस्तो होला अर्जेन्टिनाको सुरुआती ११ ?

काठमाडौं। विश्वकपको अन्तिम १६ मा इजिप्टलाई रोमाञ्चक रूपमा पराजित गर्दै अर्जेन्टिना क्वार्टरफाइनलमा पुगेको छ। अब अन्तिम आठको प्रतिस्पर्धामा लिओनल मेसीको कप्तानीमा रहेको टोलीले स्विट्जरल्यान्डको सामना गर्नेछ।

यस महत्त्वपूर्ण खेलअघि अर्जेन्टिनाको सुरुआती टोलीमा ठूलो परिवर्तन हुने सम्भावना कम देखिएको छ। मुख्य प्रशिक्षक लिओनल स्कालोनीले अघिल्लो खेलको मुख्य संरचनालाई नै निरन्तरता दिने संकेत दिएका छन्।

इजिप्टविरुद्धको खेलमा अर्जेन्टिना २–० ले पछाडि परेको अवस्थामा उत्कृष्ट पुनरागमन गर्दै ३–२ को जित निकाल्न सफल भएको थियो। टोलीको समग्र प्रदर्शनप्रति प्रशिक्षक मण्डली सन्तुष्ट रहेको बताइएको छ।

उनीहरूको विश्वासमा, खेलभर अर्जेन्टिनाले नै नियन्त्रण कायम राखेको थियो। तर अवसरलाई गोलमा परिणत गर्न नसक्नु र रक्षापंक्तिका केही कमजोरीका कारण खेल अपेक्षाभन्दा कठिन बनेको थियो।

यही कारणले स्विट्जरल्यान्डविरुद्धको खेलमा सुरुआती टोलीमा व्यापक परिवर्तन हुने सम्भावना देखिँदैन। यद्यपि दुई स्थानमा भने अन्तिम निर्णय हुन बाँकी छ। दायाँ डिफेन्समा नाहुएल मोलिना वा गोन्जालो मोन्टिएलमध्ये कसले अवसर पाउने भन्ने टुंगो लागेको छैन। त्यस्तै, स्ट्राइकरको भूमिकामा जुलियन अल्भारेजको स्थानमा लाउटारो मार्टिनेजलाई सुरुआतबाट खेलाइने वा नखेलाइने भन्ने विषय पनि चर्चा भइरहेको छ।

अन्तिम १६ को खेलमा मोलिना र अल्भारेजले अपेक्षाअनुसार प्रदर्शन गर्न सकेका थिएनन्। अर्कोतर्फ, वैकल्पिक खेलाडीका रूपमा मैदान प्रवेश गरेका मोन्टिएल र लाउटारोले प्रभावशाली प्रदर्शन गरेका थिए। विशेष गरी लाउटारोले दोस्रो गोलको निर्माणमा महत्त्वपूर्ण भूमिका खेलेका थिए भने तेस्रो गोलका लागि उत्कृष्ट असिस्ट पनि दिएका थिए। त्यसैले अन्तिम समयमा प्रशिक्षक स्कालोनीले सुरुआती टोलीमा एक वा दुई परिवर्तन गर्न सक्ने अनुमान गरिएको छ।

स्कालोनीले आगामी दुई प्रशिक्षण सत्रमा विभिन्न संयोजनको परीक्षण गर्नेछन्। त्यसपछि मात्रै स्विट्जरल्यान्डविरुद्धको अन्तिम सुरुआती टोली सार्वजनिक गर्ने अपेक्षा गरिएको छ। यद्यपि हालको अवस्थामा एक वा दुईभन्दा बढी परिवर्तन हुने सम्भावना निकै कम रहेको बताइएको छ।

अर्जेन्टिनाको सम्भावित सुरुआती टोली:

एमिलियानो मार्टिनेज, नाहुएल मोलिना/गोन्जालो मोन्टिएल, क्रिस्टियन रोमेरो, लिसान्द्रो मार्टिनेज, निकोलास टालियाफिको; रोड्रिगो डे पाउल, एन्जो फर्नान्डेज, लियन्ड्रो परेडेस, एलेक्सिस म्याक एलिस्टर, लिओनल मेसी तथा जुलियन आल्भारेज/लाउटारो मार्टिनेज।