फ्रान्स विश्वकप उपाधिको बलियो दाबेदार

काठमाडौं। सन् १९९८ र २०१८ को विश्वकप विजेता फ्रान्सले फेरि एकपटक उत्कृष्ट खेलाडीहरूको बलियो टोली निर्माण गरेको छ।

प्रभावशाली प्रदर्शन गरिरहेको फ्रान्सलाई सन् २०२६ को विश्वकप उपाधिको प्रमुख दाबेदारका रूपमा हेरिएको छ।

फ्रान्सले बिहीबार मोरक्कोलाई २–० ले पराजित गर्दै प्रतियोगिताको सेमिफाइनलमा पुग्ने पहिलो टोली बनेको हो। मोरक्कोविरुद्धको जितसँगै फ्रान्सले आफूलाई रोक्न कठिन हुने टोलीका रूपमा पुनः प्रमाणित गरेको छ।

दुईपटक विश्वकप र दुईपटक युरोपियन च्याम्पियनसिप जितिसकेको फ्रान्सले यसपटक पनि प्रतिभाशाली खेलाडीहरूको सन्तुलित टोली उतारेको छ। प्रशिक्षक डिडिएर डेसच्याम्पको अन्तिम प्रतियोगिता मानिएको यस विश्वकपमा वर्तमान टोली फ्रान्सको इतिहासकै उत्कृष्ट टोली बन्न सक्ने चर्चा सुरु भएको छ।

फ्रान्सले जुलाई १९ मा उपाधि जितेमा वर्तमान टोलीले ‘फ्रान्सको सर्वकालीन उत्कृष्ट टोली’ भएको दाबीलाई थप बलियो बनाउनेछ।

सन् १९९८ को विश्वकप फाइनलमा ब्राजिललाई ३–० ले हराउँदा फ्रान्सेली टोलीका सदस्य रहेका पूर्वमिडफिल्डर प्याट्रिक भिएराले वर्तमान टोली महान् बन्ने संघारमा रहेको बताएका छन्।

भिएराले भने, “हामी खेलाडीहरूको एउटा विशेष पुस्ताका बारेमा कुरा गरिरहेका छौँ। टोलीमा रहेका आक्रामक खेलाडीहरूलाई हेर्दा यो सम्भवतः फ्रान्सको उत्कृष्ट पुस्तामध्ये एक हो। यहाँ धेरै स्तरीय खेलाडी छन्, जुन अविश्वसनीय छ।”

बोस्टनमा भएको क्वार्टरफाइनलमा फ्रान्सले दोस्रो हाफको छ मिनेटभित्र दुई गोल गर्दै मोरक्कोलाई पराजित गरेको थियो। किलियन एम्बाप्पेले फ्रान्सलाई अग्रता दिलाएको केही समयपछि बालोन डी’ओर विजेता उस्मान डेम्बेलेले दोस्रो गोल गरेका थिए।

पहिलो हाफमा पेनाल्टीमा चुकेका एम्बाप्पेले दोस्रो हाफमा उत्कृष्ट गोल गर्दै गल्ती सच्याएका थिए। जारी प्रतियोगितामा उनको यो आठौँ गोल हो।

एम्बाप्पे अर्जेन्टिनाका कप्तान लियोनल मेस्सीसँग सर्वाधिक गोलकर्ताको सूचीमा बराबरीमा पुगेका छन्। तर, बढी असिस्ट गरेका कारण गोल्डेन बुटको दौडमा एम्बाप्पे अगाडि छन्।

डेम्बेलेले पनि यस विश्वकपमा पाँच गोल गरिसकेका छन्। पछिल्लो ५० वर्षमा एउटै विश्वकपमा दुई खेलाडीले पाँच वा त्यसभन्दा बढी गोल गरेको फ्रान्स दोस्रो टोली बनेको छ।

यसअघि सन् २००२ को विश्वकपमा ब्राजिलका रोनाल्डोले आठ र रिभाल्डोले पाँच गोल गरेका थिए।

मोरक्कोविरुद्धका दुई गोलसँगै फ्रान्सले जारी प्रतियोगितामा गरेको कुल गोल संख्या १६ पुगेको छ। यो प्रतियोगितामा कुनै पनि टोलीले गरेको सर्वाधिक गोल हो। यद्यपि, बाँकी तीन क्वार्टरफाइनल खेल हुन अझै बाँकी छन्।

स्कटल्यान्डका पूर्वस्ट्राइकर प्याट नेभिनले फ्रान्सलाई प्रतियोगिताकै सबैभन्दा कुशल र खतरनाक आक्रामक टोलीको संज्ञा दिएका छन्।

बीबीसीसँग उनले भने, “फ्रान्स प्रतियोगिताकै उत्कृष्ट, सबैभन्दा कुशल र सबैभन्दा खतरनाक आक्रामक टोली हो। उनीहरूसँग एउटामात्र होइन, दुई, तीन वा चार खेलाडी छन्, जसले जुनसुकै बेला खतरा सिर्जना गर्न सक्छन्।”

आक्रामक खेलाडीहरूको उत्कृष्ट लय र टोलीमा उपलब्ध विकल्पका कारण फ्रान्स लगातार दोस्रोपटक विश्वकप फाइनल पुग्दै तेस्रो विश्व उपाधि जित्ने बलियो दाबेदार बनेको छ।