बायर्नमै बस्ने भए नोयर

काठमाडौं। म्यानुअल नोयरले बायर्न म्युनिखसँगको आफ्नो सम्झौता थप एक वर्षका लागि नवीकरण गरेका छन्।

यससँगै ४० वर्षीय अनुभवी गोलकिपर अझै क्लबमै रहने भएका छन्। उनले आफ्नो दीर्घकालीन उत्तराधिकारी मानिएका जोनेस उर्बिगलाई मार्गदर्शन गर्ने भूमिका पनि निभाउनेछन्।

नयाँ सम्झौतापछि नोयर बायर्नमा आफ्नो १५औं सिजन खेल्ने तयारीमा छन्। यस सिजन फिटनेस समस्याबीच पनि उनले युईएफए च्याम्पियन्स लिगमा उत्कृष्ट प्रदर्शन गर्दै टोलीका कप्तान तथा पहिलो रोजाइका गोलकिपरको स्थान कायम राखेका छन्।

नोयरले हालसम्म बायर्नका लागि ५९७ खेल खेलिसकेका छन्। अब उनी क्लब इतिहासमा ६०० खेल पूरा गर्ने पाँचौं खेलाडी बन्ने नजिक पुगेका छन्।

बायर्नका वैकल्पिक गोलकिपर उर्बिगलाई भविष्यका मुख्य गोलकिपरका रूपमा हेरिएको छ। यस सिजन उनले थप अवसर पाउँदै आएका छन्। नोयरले उनलाई अनुभव बाँड्दै प्रशिक्षणमा सहयोग गरिरहेका छन्।

यसैबीच नोयरका लामो समयदेखिका सहायक गोलकिपर स्वेन उलराइखले पनि अर्को एक वर्षका लागि सम्झौता नवीकरण गरेका छन्। क्लबका खेल निर्देशक म्याक्स एबरलले भने,‘म्यानुअल र स्वेनले जोनासलाई भविष्यमा बायर्नको मुख्य गोलकिपर बन्ने यात्रामा सहयोग गरिरहनेछन्।’

नोयरले एक महिनाअघि बायर्नसँग आफ्नो १३औं जर्मन लिग उपाधि जितेका थिए। अब मे २३ मा हुने जर्मन कप फाइनलमा भिएफबी स्टुटगार्टलाई हराउन सके बायर्नले २०२० पछि पहिलो पटक घरेलु ‘डबल’ उपाधि जित्नेछ।

जर्मनी राष्ट्रिय फुटबल टोलीबाट युईएफए युरो २०२४ पछि सन्न्यास लिएपछि नोयर पूर्ण रूपमा बायर्नमा केन्द्रित भएका छन्। आगामी विश्वकपमा जर्मनीका लागि ओलिभर बाउमान पहिलो रोजाइका गोलकिपर बन्ने सम्भावना छ।