अमेरिकाले भन्यो– इराकी खेलाडीलाई भिसामा समस्या छैन

काठमाडौं। अमेरिकाले इराक राष्ट्रिय टोलीका पाँच खेलाडीलाई भिसा दिन अस्वीकार गरेको भन्ने समाचारलाई ह्वाइट हाउसले खण्डन गरेको छ। अर्को महिना हुने विश्वकपअघि यस्तो खबर सामाजिक सञ्जालमा फैलिएको थियो।

अमेरिकी विदेश मन्त्रालयले बुधबार फ्रन्ट अफिस स्पोर्ट्सलाई दिएको वक्तव्यमार्फत लुटन टाउनका फरवार्ड अली अल–हमादीसहित इराक टोलीका पाँच खेलाडीलाई भिसा नदिएको सम्बन्धी समाचार गलत भएको जनाएको हो।

वक्तव्यमा भनिएको छ,‘हाल इराक राष्ट्रिय टोलीका खेलाडीहरूलाई असर गर्ने कुनै समस्या छैन। उनीहरू विश्वकपमा सहभागी हुने योजनाअनुसार अघि बढिरहेका छन्। हामी फिफासँग दैनिक सम्पर्कमा छौं र राष्ट्रपतिको कार्यकारी आदेशअनुसार यी खेलाडीलाई प्राथमिकता दिँदै सुरक्षित र उत्कृष्ट प्रतियोगिता सुनिश्चित गर्नेछौं।’

इराक फुटबल संघले पनि मंगलबार सामाजिक सञ्जालमा फैलिएका हल्लाहरू असत्य भएको जनाएको छ। संघले इराकी समाचार वेबसाइट ‘द न्यू रिजन’ मार्फत भनेको छ,‘यो समाचार गलत हो। राष्ट्रिय टोलीका सबै खेलाडीले अमेरिकामा प्रवेश भिसा प्राप्त गरिसकेका छन्।’ साथै, खेलाडीहरू क्यानडाको भिसा प्रक्रिया पनि पूरा गरिरहेका छन्।

यस वर्ष उत्तर अमेरिकामा हुने फिफा विश्वकपमा इराक कठिन समूह ‘आई’ मा परेको छ। उक्त समूहमा फ्रान्स, सेनेगल र नर्वे पनि छन्। इराकले आफ्नो पहिलो खेल जुन १६ मा अमेरिकाको फक्सबरोमा नर्वेविरुद्ध खेल्नेछ।

त्यसपछि जुन २२ मा फिलाडेल्फियामा फ्रान्ससँग र जुन २६ मा टोरन्टोमा सेनेगलसँग प्रतिस्पर्धा गर्ने तालिका छ।